28 nëntori i pas tërmetit bën bashkë Edi Ramën dhe Ilir Metën

Ky 28 nëntor nuk ka qenë i zakonshëm për shqiptarët.

107 vjetori i pavarësisë nuk është cilësuar ditë feste, por as zie, pas tërmetit që goditi Shqipërinë të martën dhe që ka shkaktuar deri tani 40 viktima dhe 650 të plagosur.

Megjithatë, kjo ditë ka bërë bashkë kryeministrin Edi Rama dhe presidentin Ilir Meta, pas shumë përplasjesh politike kohët e fundit për Gjykatën Kushtetuese dhe krizën politike.

Sot, të shoqëruar edhe nga kreu i Kuvendit, Gramoz Ruçi, ata kanë bërë homazhe në Vlorë për nder të 28 nëntorit.

Nga Vlora, Meta tha se sot nuk është një ditë feste, por për të nderuar flamurin kombëtar.

“Të angazhohemi per te shëruar sa me pare te jete e mundur plagët e shkaktuara nga tërmeti. Te jemi sa me pranë familjeve qe kane humbur te afermit dhe te dashurit e tyre. E gjithë politika duhet te jete gjithmonë e bashkuar per ceshtjet me te rëndësishme te vendit dhe te shtetit”, u shpreh presidenti.