6 vjet pa Sokol Olldashin, miku i tij e kujton me videon e rrallë: I paharruar në zemrat tona

Gjashtë vjet më parë, në 20 nëntor humbi jetën në një aksident tragjik ish deputeti i PD, Sokol Olldashi në aksin Elbasan-Tiranë.

Një nga miqtë e politikanit, Çim Rexha e ka kujtuar politikanin me një video të shkurtër, por të rrallë, pasi Olldashi shfaqet duke luajtur në kitarë.

“Me mikun tim më të mirë Sokol Olldashi. I paharruar do ngelesh në zemrat tona, mik i dashur! Video e shkurtër, por e rrallë! Në atë kohë, celulari regjistronte vetëm 30 sekonda”, shkruan miku i tij në rrjetet sociale.

Olldashi ishte një ndër figurat më të spikatura të Partisë Demokratike, ka qenë një ndër studentët e ngjarjeve të Dhjetorit ’90 dhe katër herë deputet në Kuvendin e Shqipërisë.

Olldashi mbajti edhe postin e Ministrit të Brendshëm dhe më vonë të Transporteve dhe Punëve Publike.

Olldashi ka drejtuar Forumin Rinor të Partisë Demokratike, PD-të Tiranës, ndërsa ka qenë anëtar i forumeve më të larta të kësaj partie  kryesisë dhe Këshillit Kombëtar.