Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

A do të jetë 2020-a viti i Albin Kurtit?

Politiko 1 Janar 2020, 20:00

A do të jetë 2020-a viti i Albin Kurtit?

Irgis Hysenaj

Kur Viti i Ri 2020 trokiti, të paktë ishin ata që nuk e kishin të qartë që Albin Kurti nuk do t'i uronte vetes një vit të qetë e pa sfida. Nuk kishte se si! Por po, ai dëshiron një vit plot suksese, e sukses i madh quhet formimi i qeverisë së re.

Nëse ia del, ky do të jetë vetëm fillimi për liderin e Vetëvendosjes.

Gjetja e gjuhës së përbashkët me Lidhjen Demokratike të Kosovës është vetëm një hap i vogël i hedhur, në rrugëtimin e gjatë të partisë fituese të zgjedhjeve në Kosovë.

Sepse para janë disa çështje thelbësore për të zgjidhur.

Kur më 6 tetor u zhvilluan zgjedhjet e parakohshme parlamentare dhe pas pak më shumë se 24 orësh u pa se cili do të ishte fituesi, të gjithë, sidomos në Shqipërinë tonë, vlerësuan pjekurinë dhe seriozitetin e politikës kosovare, por edhe të institucioneve për mbarëvajtjen e tyre.

Lëvizja Vetëvendosje mori më shumë se ¼ e votave të popullit në Kosovë. Bazuar në numrin e votave të fituara, LVV në Parlamentin e Kosovës do të ketë 32 deputetë, LDK-ja 29, PDK-ja, 25 deputetë, koalicioni AAK-PSD, 14, Lista Serbe 10 deputetë, si dhe 10 vende të rezervuara, i kanë fituar partitë e minoriteteve.

Që para mbajtjes së zgjedhjeve, midis LDK-së dhe LVV-së nisën mosmarrëveshjet. Të dyja partitë menduan të hynin në zgjedhje si koalicion, por u tërhoqën për shkak se asnjëra nuk donte që të lëshonte pe për njeriun që do ta udhëhiqte koalicionin, e më pas do të bëhej kryeministër.

Pas zgjedhjeve, sovrani vendosi që mandati për të formuar qeverinë t’i jepej Albin Kurtit. Tani, ai ka vetëm dy alternativa, ose koalicion me LDK-në, ose zgjedhje të reja.

Në deklaratat e bëra, Kurti shfaqet i pashqetësuar nëse zhvillohen zgjedhje të reja. Ai e ka thënë se populli kërkon një koalicion LDK-LVV, porse nuk do t’i japë partisë së Isa Mustafës më shumë se sa i takon.

Parlamenti i Kosovës u konstituua pa një akord, ndërkohë që të gjithë në LDK shfaqën qejfmbetje, kur nga VV-ja u propozua për postin e kryeparlamentarit Glauk Konjufca, i cili më pas u votua për këtë detyrë edhe nga deputetë të LDK-së.

Për Isa Mustafën, ky post i takonte partisë së tij. Kjo shënoi krisjen e parë të vërtetë në marrëdhëniet mes të dyja partive. Kleçka në këtë çështje ka emrin president. Si LDK-ja, ashtu edhe VV-ja e duan me patjetër këtë post. Sepse kjo do të thotë kontroll mbi tjetrën.

Kjo çështje mban peng qeverinë. Ajo duhet zgjidhur pasi shtyrja e saj, siç edhe propozoi nënkryetarja e LDK-së Vjosa Osmani dhe figura më e vlerësuar nga elektorati i saj dhe jo vetëm, nuk do të bëjë gjë tjetër veçse do ta “ngrijë” përkohësisht ngërçin .

Megjithatë, tanimë që kryeparlamentari është i VV-së, rrethanat kanë ndryshuar.

Me LDK-në të prekur, duket se VV-ja duhet të mendojë për të tjera “dhurata”, në mënyrë që të rikthejë buzëqeshjet.

Këtu Albin Kurti duhet që të zgjedhë mes bujarisë në këtë fillimviti, apo palëkundshmërisë që e ka karakterizuar.

Ai e ka thënë më herët se sfidat nuk e trembin. Sigurisht që për këtë vlerësohet nga elektorati i tij, e madje edhe nga shqiptarët në Shqipëri e Maqedoninë e Veriut. Madje edhe për këto dy vende, ka projekte me rëndësi; që lëvizja e tij të forcohet edhe në vendin amë, e te shqiptarët e Iliridës. Themelet janë hedhur. Gjithsesi, ai nuk mund të shohë më tej, ndërsa në Kosovë gjithçka është e paqartë.

Në vendin e tij ka shumë punë për të bërë. Duke nisur që nga lufta e korrupsionit, krijimi i vendeve të punës, e po ashtu bisedimet me Serbinë, ku ai ka një tjetër qasje.

Ndoshta fati mund t’i kishte rezervuar rrethana më pak të komplikuara, por mbase ai nuk është mësuar më gjërat e thjeshta. E ndaj mori 26.12% të votave në zgjedhjet e tetorit. Ndoshta më mirë, sepse do të ndodhet në “habitatin” e vet.

Kështu me 2020-ën që ka pak që ka nisur, ai e ka të qartë se çfarë e pret. Ky mund të jetë viti i rrënimit, ose i lartësimit!