Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Anti-protesta si Anti-Demokraci

Politiko 15 Shkurt 2019, 15:47

Patrik Sadikaj

Hiç nuk e kuptoj këtë betejën e qeverisë që, e nxitur nga frika e protestës popullore, bën gjithçka për të ndalur uraganin.

Një pyetje kam për dy më të kënduarit e qeverisë, nxënësin e Nolit dhe dishepullin e Ismailit: A matet dot njeriu, një grup njerëzish, apo edhe një qeveri, me uraganin njerëzor?

Normalisht që si shumë të kënduar që janë, e dinë përgjigjen.

Janë njerëz që kanë gjezdisur dynjanë dhe me siguri kanë parë sesi përleshen europianët në mes të Parisit, Londrës, Romës, Berlinit, apo edhe Beogradit fort të dëshiruar prej tyre.

Vetëm diku nuk mund të protestosh! E dini se ku nuk mund të protestosh se të fusin në burg dhe të dënojnë si armik të pushtetit? Në Rusi. Aty nuk proteston dot, sepse protesta është kriminalizuar, ashtu siç në mënyrë të habitëshme historike, paralajmëroi ta kriminalizojë edhe Policia e Shtetit.

Normalisht, Policia e Shtetit duhet vetëm të garantojë rend e siguri, por atë që u bë për 10 vite për depolitizimin e saj, e zhbën Rilindja me një të rënë të bilbilit të kryeministrit. Policët e shkretë, duhet të ruajnë dyer shkollash e universitetesh, hallexhinj që ngrenë zërin për bukën e gojës, por kurrsesi të rrinë te dera e kriminelit që ditën për diell, vret, grabit, mbledh vota, dhunon etj.

Për dy njerëz mëndjendritur, nuk besoj se protesta është diçka që duhet me ia pasë frikën. Nëse pranuan në njërën faqe shuplakën e studentëve, le të durojnë edhe grushtin e shqiptarëve. Fundja ata për këtë popull, po rropaten ditë e natë.

Protesta është Demokraci!

Një njeri edhe pse në publik del si apolitik, duhet ta kuptojë demokracinë. Por në këtë rast, duhet të presim dëshpërimisht të shohim cilësitë e një njeriu të lançuar në publik nga vetë sfiduesi i diktaturave, Ismail Kadare. Me sa duket, afërsia gati 6 vjeçare me ERTV-në (nuk po e quajmë kohën e dashurisë së pashpallur) e kanë ndryshuar mendësinë e njeriut jopolitik. Tani, mbase edhe pa dijeninë e tij e ka kaluar ylberin dhe është futur thellë në shiun e pistë të njeriut të partisë.

Mbase nuk i mendon, por pa pikë vrasje në ndërgjegje i thotë.

Sa për ERTV-në, nuk besoj se ka nevojë të harxhohen shumë fjalë. Të jetosh në mes të Parisit dhe të vish prej andej me mitin e njeriut të adhuruar nga francezët, nuk besoj se do shumë mend të kuptosh kaq pak gjë. Normalisht mes adhuruesve të panumërt francezë për artistin shqiptar, por me famë botërore si lider global, ka edhe nga ata që kanë disa muaj që i bëjnë tym e flakë rrugët e Parisit.

Edhe vetë dikur, jo shumë larg në kohë, ERTV ishte një nga ata që protestat në Paris, Londër, Berlin apo Romë (po e lëmë mënjanë Rumaninë) i quante demokraci. Madje në krye të protestave të dhunshme ishte vetë, në një kohë shumë të afërt, kur pushtetin donte.

Ai e di fort mirë, ia kanë thënë edhe miqtë tanë amerikanë, europianë, venezuelianë, kirgistanas e me rradhë, se protesta është shprehja më e madhe e Demokracisë.

Nëse ai i del përballë, atëherë ndryshimi është shumë më i madh sesa koncepti i një fjale.

Nëse i del kundër protestës (demokratike), atëherë i ke dalë kundër Demokracisë!

Unë jam shumë i vogël për t'i dhënë mendje dikujt që mendjen e ka globale, por ama dy fjalë si qytetar i këtij vendi dhe njeri i angazhuar mund edhe t'i them.

Askush nuk i del dot kundër uraganit njerëzor. Askush nuk i del dot kundër Demokracisë. Mbase nuk jemi populli me ndjeshmërinë më të madhe demokratike, por ama ka ardhur koha që këtë sistem vlerash, që quhet Demokraci dhe që deri tani ka rezultuar sistemi më i mirë, ta ndërtojmë në këtë vend. Dhe nëse për hir të kësaj do na duhet të largojmë dikë nëpër rrugët e botës, mos ta lagojmë popullin, por ata që janë pengesa e Demokracisë.