Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

'Armët në kishë' dhe 'rusët në SHQUP'

Politiko 25 Shkurt 2019, 19:09

Alfred Lela

Kryetari i Partisë Demokratike, Lulzim Basha, u detyrua të sqaronte një shfaqje të tijën në një kronikë të televizonit Russia Today, që njihet si përhapës i ideve të Kremlinit zyrtar. Basha tha se intervista i ishte marrë nga Associated Press.

Gazetat e majta që nxituan ta 'demaskonin' si pro-ruse opozitën shqiptare dhe liderin e saj, e dinë shumë mirë se të gjitha kronikat e televizoneve të huaja për ngjarjet në Shqipëri kanë, zakonisht, dy burime: agjencitë e lajmeve Reuters dhe Associated Press. Kjo është një prej formave të 'ekonomizimit të medias' të televizoneve të mëdha, të cilat nuk mund të përballojnë shpenzime korrespondentësh në çdo vend të globit, kështuqq ato pajtohen në agjencitë e mëdha të lajmeve.

Fakti që televizionet apo gazetat e mëdha si CBS, Ëashington Post etj. i marrin kronikat e agjencive të lajmeve, i jep rëndësi lajmit nga Shqipëria, por nuk e ndryshon faktin se ato janë lajme 'të huazuara'. Hapini kronikat e fundit nga zhvillimet në Shqipëri te mediat kryesore, dhe do të gjeni se aty shënohet që në krye si burim Reuters apo Associated Press.

I tillë është rasti edhe me lajmin e Russia Today. Intervista e Bashës është marrë nga Associated Press dhe i është 'shitur' televizonit rus që transmeton lajme në anglisht.

Por nuk është ky lajmi, sepse këtë redaktorët e medias së majtë në Shqipëri e dinë fare mirë. Vetëm se u ka interesuar që t'i japin këtë kënd, i cili i kontekstualizon protestat e opozitës si të cytura apo të promovuara nga rusët, me qëllimin e qartë delegjitimimin e tyre si antiperëndimore.

Lajmi është se kryetari i opozitës, i një partie të djathtë, konservatore, siç është PD, është i kompleksuar. Mjaftueshëm sa për të dalë, si rrallëherë, për të përgënjeshtruar pavërtetësinë e një lajmi.

Ky kompleksim më shumë se Bashën shpjegon se deri ku është përmbysur raporti me të vërtetën në Shqipëri. Si mediat proqeveritare bëjnë propagandë të pakufizuar duke kthyer kokëposhtë edhe një rend të sprovuar të gjërave. Paradoksalisht, Partia Demokratike, një parti nacionaliste, konservatore, anti-komuniste, properëndimore është goditur nga kundërshtarët e saj të majtë, Partia Socialiste, një forcë që historikisht ka qenë e prirur kah internacionalizmi, socializmi botëror, etj., pikërisht te çka ajo mund të jetë më pak: komuniste, pro ruse, pro serbe, e me radhë.

Traditë, po të citojmë Burken, do me thënë me bartë një peng të shenjtë. Të thuash se tradita e një partie të majtë socialiste, që vjen nga fryma bolshevike e 1920-ës e Fan Nolit dhe sovjetizmi stalinist i Enver Hoxhës, është euroatlanticizmit, ndërsa ajo e një partie të djathtë, nacionaliste, konservatore si PD, e mbështetur te Zogu, dhe më pas fryma antikomuniste e Diasporës, veriut të Shqipërisë, e me radhë, është prosllave, është një kapërcim i marrë i imagjinatës.

Ky ka qenë në fakt, fati i së djathtës gjithmonë: kur komunistëve u interesonte Rusia dhe Jugosllavia, ata fusnin armë në kishë dhe arrestonin priftërinjë antikomunistë si 'agjentë të Vatikanit'. Me radhë, kundërshtarët e vet 'të reaksionit' ishin agjentë të Austrisë, Italisë dhe Amerikës.

Tani që të majtëve të rinj u intereson e kundërta, të djathtët janë agjentë të Beogradit, Moskës, Pekinit e me radhë.

Lulzim Basha, që reciton me aq pasion pjesë të fjalimit të Linkolinit, i duhet të ruhet, por të mos kompleksohet. Komunistët do të vazhdojnë të fusin armë në kishë dhe ta quajnë priftin 'bandit' dhe 'agjent të të huajve'.

Kur e kanë bërë këtë në 'shtëpinë e Zotit', selia e PD për ata është thjesht SHQUP.