Bardhi: Nëse Rama nuk do kishte lidhje me krimin, negociatat për në BE do të ishin hapur

Sekretari i Përgjithshëm i PD, Gazmend Bardhi, ka bërë përgjegjës kryeministrin Edi Rama për vendimin Holandës që është kundër hapjes së negociatave BE-Shqipëri. Sipas zyrtarit të demokratëve, nëse kreu i PS nuk do të bënte pakt me krimin, atëherë situata do të ishte ndryshe.

Reagimi i tij erdhi me anë të një statusi në profilin e tij në Facebook.

“Kryeministri i Avdylajve duhet t’i shpjegojë qytetarëve se përse Holanda ka vendosur t’i thotë JO hapjes së negociatave me Shqipërinë, në të njëjtën ditë ku ka vendosur ti thotë PO hapjes së negociatave më Maqedoninë e Veriut. Për Shqipërinë, ligjvënësit e Holandës kanë vlerësuar se “nuk po arrin rezultate të prekshme në luftën kundër korrupsionit dhe krimit të organizuar, si dhe në bazë të Raport-Progresit mund të vërtetohet se Shqipëria nuk i plotëson kushtet e vendosura”.

Nëse Edi Rama nuk do të kishte bërë marrëveshje me krimin e organizuar për të ardhur dhe mbajtur pushtet, Shqipëria do të kishte nisur bisedimet e anëtarësimit prej shumë kohësh. Edi Rama ka bllokuar integrimin europian dhe mundësinë për mirëqenie dhe stabilitet për qytetarët. Ai është sot në sytë e të gjithëve njeriu më i rrezikshëm në vend, sepse për pushtetin e tij kriminal, është gati të sakrifikojë demokracinë dhe të ardhmen europiane të Shqipërisë.

Beteja jonë kundër korrupsionit, krimit të organizuar dhe për të garantuar zgjedhjeve të lira e të ndershme, është betejë për Shqipërinë si gjithë Europa! Asnjë hap pas!”, shkroi Bardhi.