Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Basha vë një minë në kufirin e pushtetit

Politiko 24 Shtator 2018, 18:28

Basha vë një minë në kufirin e pushtetit

Alfred Lela

Lulzim Basha akuzoi para tri ditësh, në një konferencë të organizuar në Tiranë, ndërkombëtarët për heshtjen në raport me shpërdorimet e pushtetit në Shqipëri duke thënë se ata ‘flasin me patate në gojë’.

Jo rrallë edhe opozita është percpetuar si ‘folëse me patate në gojë’ në raport me ata që ajo vetë kishte denoncuar si oligarkë të Shqipërisë të lidhur me pushtetin e Edi Ramës. Jo më.

Që prej së hënës së 24 shtatorit në ‘Paketën e çlirimit të ekonomisë: kundër korrupsionit dhe oligarkisë’, eksponentet e Partisë Demokratike që e kanë prezantuar, si dhe vetë shefi i opozitës Basha, afishuan një listë me të gjthë emrat, të gjitha koncesionet dhe të gjitha abuzimet në raport me pasurinë publike.

Edhe nëse e ka patur opozita është çliruar prej standardit të dyfishtë, konfliktit të interesit apo ‘patateve në gojë’ dhe ka folur qartë sot, duke marrë angazhimin e saj të hapur si mbrojtëse e interesit publik.

Paketa antikorrupsion e paraqitur nga opozita nuk është e rëndësishme vetëm për thelbin, për atë që përfaqëson dhe mbron, pra për një gjë lëndore që mund të preket e shihet, por edhe për diçka tjetër. Ajo i çon një shenjë të fortë publikut duke i dhënë partneritet, duke i kërkuar të nënshkruaje me të një kontratë sociale. Kontrata të tilla kanë fuqinë bindëse dhe lidhëse, jo vetëm të një bashkëpunimi apo ‘bese’, por ato vënë në punë mekanizma jolëndorë, efemerë, që nuk shihen dhe as preken, si besimi dhe shpresa.

Shpresa për të qëndruar, për të mos ikur nga Shqipëria, pra një Front i Përbashkët Rezistence dhe Shprese mes opozitës dhe publikut është një domosdoshmëri në kushtet kur perspektiva bëhet e mjegullt këtu dhe ajo kërkohet gjetkë, kryesisht në Perëndim.

Paketa antikorrupsion duhet parë kësisoj edhe si instrument komunikimi. Ajo komunikon në dy rrafshe: me pjesën tjetër të politikës, (atë që presupozohet si e korruptuar dhe abuzive) dhe me publikun. Jo vetëm një publik të interesuar në gjënë e përbashkët publike, por edhe një publik më të vogël i cili ka interesa të vetat të drejtëpërdrejta, klasa e biznesit, e cila është prekur nga njëanshmëria e qeverisë në raport me shpërndarjen e pasurive publike, garën etj.

Një tjetër zgjatim i komunikimit është edhe qëllimi politik i paketës. Opozita kërkon prej shumicës qeverisëse vullnetin për ta pranuar, debatuar, ligjëruar dhe zbatuar këtë paketë. Rama nuk do ta ketë të lehtë, madje e ka të pamundur identifikimin me këtë paketë. Për faktin e thjeshtë se ndërverprimi me të i rrëzon jo vetëm pushtetin e tashëm por edhe gjasat e pushtetit të nesërm.

Disbursimi kësaj paraje të madhe publike drejt pak duarve ka patur si synim themelimin e një kaste që e ndikon vazhdimisht pushtetin politik nëpërmjet atij ekonomik.

Me këtë minë me sahat në dorë Bashës i duhet të ecë tashmë, për muaj a vite, derikur ta instalojë përfundimisht te rrënjët e kësaj krize që janë njëkohësisht edhe rrënjët e zgjidhjes. Në fillim do të vijë ridikulizimi, siç ndodhi edhe me propozimin e tij për dekriminalizimin. Në fund, një ideje të mirë gjithmonë i vjen koha.

Ajo nuk duhet lënë rrugës sepse nuk është nga ato lloj minash që vrasin vetëm ata që e shkelin.