Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Berlini tha ‘të shohim’, dhe për këtë nuk ka faj Moska

Politiko 25 Prill 2018, 19:25

Berlini tha ‘të shohim’, dhe për këtë nuk ka faj

Alfred Lela

Kryeministri i Shqipërisë është përballur sot në Gjermani, gjatë takimeve me kancelaren Angela Merkel dhe përfaqësues të tjerë të lartë të Berlinit zyrtar, me një ‘të shohim’. Ka disa kushte paraprake, ka thënë në deklaratën e saj për shtypin Merkel, sa i takon hapjes së negociatave të anëtarësimit të cilat kanë marrë Po-në e Komisionit Europian, por presin një përgjigje finale nga Këshilli i Europës në fund të qershorit.

Shqiptarët do t’i gëzonte një Po e Merkelit, e cila sipas shumë gjasash do të ishte edhe afirmativi i gjithë Këshillit të Europës, duke ditur peshën që ka Gjermania në punët dhe vendimet e BE. Ajo nuk e ka thënë Po-në dhe gjëja me mend është të mos e shpallim spiune ruse!

Merkel, pak a shumë, ka përsëritur të njëjtin mesazh të përfaqësuesit të partisë së saj, CDU, në parlamentin gjerman Gunther Krichbaum, i cili u kryqëzua nga mediat afër Kryeministrit kur ‘guxoi’ të shpallte se kandidatura e Shqipërisë po shqyrtohej sërish dhe asgjë nuk ishte mbyllur.

Kjo ishte pasqyra e deputetit gjerman i cili nuk ishte kritiku i vetëm nga Bundestagu sa i takon progresit të Shqipërisë, apo më saktë problemeve të saj. Thorsten Frei, edhe ai kristiandemokrat, është shprehur në terma më të qartë sa i takon atyre që ai shihte si pengesa. Në një konferencë shtypi në Tiranë në fillim të vitit, Frei shprehu hapur habinë se si deputetit socialist Saimir Tahiri nuk i ishte hequr mandati pas dyshimeve dhe akuzave të forta.

Frei përmendi kanabisin si një tjetër problem për Tiranën zyrtare dhe rrugën e saj drejt çeljes së negociatave. Raportet e Krichbaum dhe Frei, dy deputetë konservatorë të Bundestagut në ‘kujdestari’ të Shqipërisë, shqyrtohen nga parlamentarët gjermanë dhe shkojnë si konkluzione në tryezën e punës së kancelares.

Nuk ka skepticizëm gjerman, pat deklaruar kryeministri Rama pak pas publikimit të rekomandimit pozitv të Komisionit Europian. Ai zgjodhi një kurs përplasjeje me opozitën, gazetarët dhe deri me deputetin Krichbaum, që i shfaqën këto shenja skepticizmi.

Berlini i tha sot ‘prit’ kryeminitrit shqiptar, dhe ai nuk duhet të shohë dorë të Bashës dhe as të Moskës në këtë punë. Kryetari i PD ka qenë në Berlin, dhe për fjalë të mira në favor të Shqipërisë, sipas tij.

Por, siç ndodh gjithmonë, janë punët e këqija të qeverisë së Ramës që kanë mbërritur atje më shpejt. Merkel mbi këto të fundit i artikuloi ‘kushtet paraprake’.