Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

BILD, një herë si kurvë tjetrën si shenjtore

Politiko 20 Janar 2020, 17:59

BILD, një herë si kurvë tjetrën si shenjtore

Alfred Lela

Edi Rama është në gjyq me gazetën gjermane BILD e cila, para disa muajsh botoi një seri shkrimesh ku eksponentë të qeverisë socialiste shqiptare shkëmbenin dialogje të ngjashme me personazhet e filmave amerikanë që portretizojnë Al Kaponen.

Emri i Ramës qarkullon nëpër përgjimet e BILD, por e vetmja bisedë ku ai dialogon është inkonkluzive dhe pas asnjë vjegë fajësie. Faji i z. Rama, megjithatë, nëse nuk shtrihet te ato biseda qëndron te yshtja apo lejimi i atij sistemi që shpërfaqet në ato biseda. Edhe nëse kryeministri mund të kapet pas plausiable deniability*, atë që ne nuk e provojmë dot për të e shohim të jetë pasojë e asaj që ai ka themeluar.

Para se publiku shqiptar, i vetmi i interesuar për përgjimet e BILD dhe rrjedhojat, të marrë vesh se si shkon gjyqi, ai është përballur me një tjetër 'interferencë' të tabloidit gjerman. Lobimin rus me para të dyshimta të kryetarit të opozitës, Lulzim Basha. Mund të thuhet se z. Basha dhe lidhja e hamendësuar ruse ka qenë anti-çështja e socialistëve, sa herë shtypi i huaj apo vendas kanë ngritur një çështje që shkon kah skandali dhe cënon reputacionin e qeverisë Rama. Basha ka ndihmuar disi në lehtësimin e retorikës qeveritare duke u shfaqur i paqartë në deklaratat në lidhje me çështjen.

Gjithë ky konfuzion, paradoksalisht, na shërben edhe ca përgjigje apo dyshime të arsyeshme për çka po diskutojmë. Fakti që BILD publikon një shkrim denoncues për opozitën, e cila është akuzuar nga mazhoranca se ka frymëzuar dhe furnizuar gazetën si pjesë e luftës së brendshme politike në rastin e përgjimeve, e bën koherente 'pretencën' e qeverisë. Por, kujdes: thika duhet lënë të presë në të dy anët! Nëse akuza e qeverisë është e vërtetë, atëherë vlen e njëjta logjikë edhe për të kundërtën: shkrimi i ri i BILD është gjithashtu lobim dhe jo gazetari.

Këtë logjikë e ndihmon edhe statusi juridik mes dy subjekteve në fjalë: kryeministrit Rama dhe gazetës gjermane BILD. A është shkrimi anti-Bashë akordi që kanë arritur palët me njëra-tjetrën? Rama e pushon çështjen dhe BILD boton, 'si favor', anti-çështjen e përdorimit të brendshëm, 'lobimin rus' të Lulzim Bashës...

BILD habit kur i jep çështjes së lobimit një spërdredhje të panjohur më parë. Deri më tani mesazhi që ka dashur të përcjellë qeveria me anti-çështjen ka qenë se Basha ka: a-përdourur para të dyshimta; b-me kompani të dyshimta offshore; c-kompani që kanë lidhje me qarqe ruse; d-për të siguruar akses në ShBA me qëllim ndikimin te administrata Trump.

'Kthesa' e re që BILD i jep anti-çështjes së qeverisë shqiptare, pra lobimi i Bashës dhe PD me synim pengimin e përpjekjeve të Ramës dhe qeverisë së tij në angazhimin drejt BE, është noviteti dhe habia e madhe që ngjall shkrimi i gazetës gjermane.

Çuditërisht përkon me kokëdhembjen më të madhe aktuale të Ramës, ngecjen në dyert e procesit të antarësimit të vendit në BE. Gjyqi i Ramës me tablodin dhe prospekti europian, disa herë i mbetur në klasë i qeverisë së tij, mund të jenë takuar krejt rastësisht në Berlin dhe në këtë rast. Megjithatë kjo përkitje vlen të theksohet.

Nuk ka ndonjë nevojë theksimi për standardin e dyfishtë i cili bërtet aq shumë, edhe pse përdoret aq shumë sa duket se do të anulojë vetveten. Kur BILD botonte përgjimet, socialistët hidheshin përpjetë sikur shtatëqind dreqën t'i kishin ngacmuar dhe e margjinalizonin gazetën gjermane duke e quajtur 'bulevardeske', 'skandalistike', 'të shitur e të blerë' dhe, në fund, duke e hedhur në gjyq. Kur e njëjta media u hapi faqet për anti-çështjen e tyre tonet laudatore të të njëjtit zhgan relativistësh e sharësish na mbërritën në veshë, të forta sa arabeskat e muezinëve të xhamive të Tiranës në sabah të ditës.

*Plausible deniability është aftësia e zyrtarëve për të mohuar çdo dijeni apo përgjegjësi për çdo aksion të dënueshëm të kryer nga të tjerët në hierarkinë organizative për shkak të mungesës së provave që mund të provojnë përfshirjen e tyre, edhe nëse ata kanë qenë në dijeni të gjërave.