Bullgaria refuzon ndihmën ushtarake për Ukrainën

Sekretari i Mbrojtjes i SHBA-së, Llojd Austin është në një vizitë dy-ditore në Bullgari për bisedime me kryeministrin bullgar Kiril Petkov dhe ministrin e mbrojtjes Dragomir Zakov.

Ata do të diskutojnë bashkëpunimin e mbrojtjes SHBA-Bullgare dhe planet e NATO-s për të forcuar krahun e saj lindor mes pushtimit rus të Ukrainës.

Petkov ka përjashtuar mundësinë e ofrimit të ndihmës ushtarake për Ukrainën, por tha se vendi i tij, një aleat i NATO-s, do të vazhdojë të ofrojë ndihmë humanitare.

"Bullgaria do të vazhdojë të bëjë gjithçka që është e mundur për të ndihmuar ukrainasit në këtë luftë të vështirë dhe këtë agresion të madh që Federata Ruse u ka shkaktuar atyre," u tha ai gazetarëve.

“Por duke qenë kaq afër konfliktit, tani për tani, ndihma ushtarake për Ukrainën nuk do të jetë e mundur.”

Bullgaria, e cila nuk kufizohet me Ukrainën, por ka pranuar mijëra refugjatë, ka rënë dakord të presë një kontigjent të ri trupash të NATO-s si pjesë e shtytjes së aleancës për të përforcuar krahun e saj lindor.

Do të krijohet një grup beteje prej deri në 1000 trupa nën komandën operacionale të Komandantit Suprem të Aleatëve të NATO-s në Evropë.

Sekretari amerikan i Mbrojtjes e falënderoi Petkovin për mbështetjen e tij.

"Ne folëm gjithashtu për gjërat që forcat tona po bëjnë së bashku dhe sigurisht që ne mbetemi mirënjohës për udhëheqjen e tij dhe për Bullgarinë për pritjen e një grupi beteje këtu," tha Austin.

Ndërkohë, protestuesit u mblodhën në një park pranë Ministrisë së Mbrojtjes të Bullgarisë, ndërsa bisedimet po zhvilloheshin.

Të rrethuar nga policia, ata brohoritën dhe mbanin pankarta, ndërsa disa valëvitnin flamuj bullgarë dhe rus.

Burimi: Euronews