Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Bota

E para grua në këtë post, Senati amerikan konfirmon Janet Yellen si sekretare Thesari

Politiko 26 Janar 2021, 08:21

E para grua në këtë post, Senati amerikan konfirmon Janet Yellen

Senati amerikan ka miratuar ditën e hënë kandidaten e Presidentit Joe Biden për postin e sekretares së thesarit. Janet Yellen, do të jetë shefja e 76-të në historinë e vendit që merr drejtimin e këtij institucioni, ndërsa është e para grua që i besohet ky post. Mësohet se Yellen mori 84 vota pro dhe 15 kundër, duke u bërë anëtarja e tretë e kabinetit të Presidentit Biden që kalon procesin e konfirmimit në Senat.

Ajo pritet të luajë një rol të rëndësishëm në përpjekjet e Presidentit Biden për të siguruar miratim për paketën e ndihmave prej 1.9 trilionë dollarësh në përgjigje të pandemisë. Paketa ka hasur në rezistencë të fortë nga republikanët në Senat, të cilët duan një paketë shumë më të vogël. Duke folur pak para votës në Senat, udhëheqësi i shumicës demokrate, Chuck Schumer vuri në dukje se zonja Yellen, ish-kryetare e Rezervës Federale, gëzon mbështetje dypartiake.

Zoti Schumer tha se zonja Yellen ka një eksperiencë shumë të gjerë dhe mbështetja për të reflekton “se sa e përshtatshme është ajo për të menaxhuar sfidat ekonomike të kohës sonë… sidomos këtë moment krize ekonomike”. Gjatë seancës për konfirmimin e saj në Komisionin e Senatit për Financat javën e kaluar, zonja Yellen argumentoi se pa veprime të menjëhershme, vendi do të kërcënohet nga “një recesion më i gjatë dhe më i dhimbshëm”. Ajo bëri thirrje për veprim të shpejtë për të miratuar paketën e ndihmave kundër goditjes së pandemisë, e cila përfshin pagesa të drejtpërdrejta prej 1400 dollarësh për individë që marrin më pak se 75,000 dollarë në vit, zgjerimin e asistencës së papunësisë si dhe mbështetje për bizneset dhe qeverisjet lokale në vështirësi.

Janet Yellen do të luajë një rol të rëndësishëm në drejtimin dhe formulimin e politikave ekonomike të Presidentit Biden. Ajo vjen në këtë detyrë pasi drejtoi për katër vjet Rezervën Federale nga 2014-2018.
Me profesion ekonomiste, me përvojë si profesore në Universitetin e Kalifornisë në Berkley, zonja Yellen do të përfaqësojë Presidencën Biden në çështje financiare globale, si dhe do të mbikëqyrë politikat mbi rregulloret bankare dhe do të shërbejë si pikë kontakti me sektorin financiar. Ndër të tjera Yellen ka rënë dakord të izolohet nga vendime që prekin interesat e firmave me të cilat ajo ka pasur shkëmbime në të kaluarën./ VOA