Pas Francës edhe Britania e Madhe shton masat kufizuese, shkak rritja e rasteve në kujdes intensiv

Pas Francës edhe Britania e Madhe ka ashpërsuar masat kufizuese pas një rritje të numrit të rasteve me  Covid-19.

Sipas CNN, Parisi do të vendosë “shtetrrethimin” që nga e enjtja, ndërsa Londra do të ndalojë njerëzit nga familje të ndryshme që të takohen në mjedise të mbyllura për të luftuar përhapjen e koronavirusit.

Shkelja e shtetrrethimit do të ketë një gjobë prej 135 euro (rreth 160 dollarë) për një shkelje të parë dhe 1500 euro (1,760 dollarë) nëse shkelja përsëritet. Franca raportoi 22,591 raste të reja dhe 95 vdekje të vetëm të mërkurën, duke e çuar totalin e saj në 779,063 raste dhe 33,037 vdekje.

Londra do të kalojë nga një nivel mesatar i kufizimeve në një nivel më të lartë, nisur që nga e shtuna në mëngjes, njoftoi sekretari i shëndetësisë, Matt Hancock.

Kjo do të thotë që londinezët do të ndalohen të takohen me persona të tjerë  në kafene, pube apo restorante. Takimet në natyrë do të jenë të kufizuara për gjashtë persona dhe njerëzit gjithashtu duhet të shmangin përdorimin e transportit publik kur është e mundur.

"Ne e dimë që nga vala e parë që infeksioni mund të përhapet shpejt dhe të ushtrojë presione të mëdha në NHS (sistemi shëndetësor britanik), kështu që ne duhet të veprojmë tani për të parandaluar nevojën për masa më të ashpra më vonë," tha Hancock.

Më herët, kryebashkiaku i Londrës, Sadiq Khan tha se kryeqyteti kishte arritur në një "moment kritik" në luftën e tij kundër pandemisë, duke paralajmëruar që virusi po përhapet me shpejtësi "në çdo cep" të qytetit.

"Pranimet në spital janë rritur, më shumë pacientë po shkojnë në kujdes intensiv dhe, fatkeqësisht, numri i londinezëve që vdesin çdo ditë po rritet përsëri," i tha ai Asamblesë së Londrës.
Në një letër paraprake të shkruar nga këshilltarët shkencorë të qeverisë së MB, pretendohet se mijëra vdekje nga koronavirusi mund të shmangen para fundit të vitit nëse një karantinë dy javore do të imponohej së shpejti.

Shkencëtarët më të mirë të Britanisë besojnë se këto masa do të ulin rastet e Covid-19.

Këto bllokime, që zgjasin vetëm disa javë, janë të shkurtra, të kufizuara dhe të ashpra. Irlanda e Veriut do të vendosë kufizime të tilla të premten, me pijetore, restorante dhe palestra që do  të mbyllen.

Të dhënat e Mbretërisë së Bashkuar treguan 19,724 raste të reja dhe 137 vdekje të mërkurën, duke arritur gjithsej përkatësisht në 654,644 infeksione dhe 43,155 vdekje.

Edh Irlanda e Veriut po mbyll shkollat, pub-et dhe restorantet pasi raportoi 1,217 raste të reja Covid-19, një rekord i lartë për vendin, duke çuar gjithsej rastet në 23,115.

Edhe kancelarja gjermane Merkel është e shqetësuar  për rritjen eksponenciale të rasteve pozitive.

"Rreth 80% e vendeve anembanë rajoneve evropiane po shohin një rritje" në rastet e Covid-19, tha për CNN,  Maria Van Kerkhove udhëheqësja  teknike  e Organizatës Botërore të Shëndetësisë.

"Sigurisht që po shohim një situatë mjaft shqetësuese në të gjithë Evropën, ku po shohim një ringjallje. Ne po shohim një rritje të transmetimit në një numër të madh të vendeve në të gjithë rajonin,"  tha Van Kerkhove për CNN.

Ajo tha se shumë vende e vunë virusin nën kontroll më herët gjatë pandemisë dhe ata mund ta bëjnë përsëri, duke shtuar se ndërhyrjet duhet të ashpërsohen.

Kancelarja Merkel po vendos gjithashtu kufizime më të rrepta në pikat e nxehta të koronavirusit, duke thënë se ndihet "e shqetësuar" për "rritjen eksponenciale" të ditëve të fundit.

Takimet shoqërore do të jenë të kufizuara në vetëm 10 persona dhe baret dhe restorantet duhet të mbyllen deri në orën 11:00. në rajonet ku normat e infektimit janë më të larta.

Kufizimet do të vlerësohen në 10 ditët e ardhshme për të zbuluar nëse ato kanë ngadalësuar shpejtësinë e virusit. Merkel gjithashtu iu drejtua të rinjve tëgjermanë, duke i nxitur ata të respektonin rregullat.

Numri i rasteve në Gjermani u rrit me një rekord prej 6.638 në 24 orë, sipas të dhënave të botuara nga Instituti Robert Koch (RKI), duke i çuar gjithsej në 341,223 infeksionet. Rritja e dytë më e lartë ditore ishte 6,294 në 28 Mars.
Gjermania regjistroi gjithashtu 33 vdekje të reja në 24 orët e fundit, duke e çuar totalin në 9,710.

Republika Çeke regjistroi të mërkurën një rekord prej 9,544 rastesh të reja, një rritje prej 926 nga rekordi i mëparshëm i vendosur të premten e kaluar, njoftoi Ministria Çeke e Shëndetësisë.

Numri i përgjithshëm i rasteve ka arritur në 139,290, sipas shifrave të Universitetit Johns Hopkins.

"Prognoza nuk është e mirë, shifrat janë shumë katastrofike," tha të enjten kryeministri Andrej Babis.

Të dhënat e qeverisë Çeke treguan 35 vdekje të regjistruara të mërkurën, duke e çuar numrin e të vdekurve në 1,172, ndërsa 2,678 njerëz mbeten të shtruar në spital me koronavirus.

Kufizime të reja u prezantuan me mbylljen e shkollave, bareve dhe restorantet, të cilët do të qëndrojnë hapur der në orën  20:00 të mbrëmjes.