Pas Pfizer, SHBA miraton vaksinën Moderna kundër Covid-19

Vaksina "Moderna" është aprovuar nga qeveria amerikane si vaksina e dytë në vend ndaj Covid-19, duke i hapur rrugën miliona dozave për përdorim.

Administrata e Ushqimit dhe Barnave (FDA) autorizoi vaksinën e bërë në SHBA rreth një javë pasi miratoi një vaksinë Pfizer / BioNTech e cila tani po shpërndahet.

SH.B.A. ka rënë dakord të blejë 200 milion doza Moderna dhe gjashtë milion mund të jenë gati të dërgohen tani.

Vendi ka numrin më të lartë në botë të vdekjeve dhe rasteve nga Covid-19, shkruan BBC.

Komisioneri i FDA Stephen Hahn tha se miratimi emergjent i vaksinës të Premten shënoi "një hap tjetër thelbësor në luftën kundër kësaj pandemie globale që po shkakton një numër të madh të shtrimeve në spital dhe vdekjeve në Shtetet e Bashkuara çdo ditë".

Autorizimi erdhi pasi një panel këshillimor të enjten votoi 20-0 me një abstenim se përfitimet e vaksinës Moderna tejkaluan rreziqet për ata të moshës 18 vjeç e lart.

Rregullatorët raportuan në fillim të kësaj jave se vaksina Moderna ishte e sigurt dhe 94% efektive.

Presidenti i SHBA, Donald Trump, i cili disa orë para njoftimit zyrtar në Twitter shkroi se vaksina ishte "aprovuar me shumicë dërrmuese" dhe shpërndarja do të "fillonte menjëherë".

"Urime, vaksina Moderna tani është në dispozicion!" shkroi Trump në Twitter.

Presidenti i zgjedhur Joe Biden, i cili pritet të vaksinohet të hënën, tha se autorizimi i Pfizer dhe Moderna "na siguron që ditë më të mira priten". Por, shtoi ai, "lufta kundër Covid-19 nuk ka mbaruar ende".

"Ne i dimë sfidat e mëdha përpara, përfshirë shkallëzimin e prodhimit, shpërndarjen dhe detyrën monumentale të vaksinimit të qindra miliona amerikanëve. Ne duhet të sigurohemi që kemi burime për t'i bërë të gjitha këto dhe për t'i bërë ato shpejt", shkroi Biden nw Twitter.

Nga ndryshon Moderna nga vaksina Pfizer?

Vaksina e prodhuar nga korporata amerikane Pfizer dhe BioNTech SE e Gjermanisë kërkon temperatura më afër -75C, duke e bërë logjistikën e transportit shumë më të vështirë.

Ashtu si Pfizer, vaksina Moderna gjithashtu kërkon një dozë të dytë përforcuese. Injeksioni i dytë i Moderna vjen 28 ditë pas të parit, krahasuar me 21 për Pfizer.

Moderna është me qendër në Kembrixh, Massachusetts, dhe më parë kishte thënë se "shumica dërrmuese" e dozave të saj do të prodhohej atje. Pfizer / BioNTech po prodhohet në disa vende, përfshirë Gjermaninë dhe Belgjikën.