Raporti bombë: Si i përdori George Soros 40 milionë dollarë në “bamirësi politike”

Fushata e kandidatit për kryetar bashkie të Nju Jorkut, Zohran Mamdani, po përballet me akuza serioze se ka përfituar dhjetëra miliona dollarë në financime të kanalizuara përmes organizatave bamirëse të lidhura me miliarderin George Soros, në një skemë që dyshohet se mund të ketë shkelur ligjet federale tatimore.

Raporti që ngriti dyshimet

Daily Mail shkruan se sipas një raporti të publikuar nga faqja konservatore hetimore White Collar Fraud, një rrjet fondacionesh dhe organizatash jofitimprurëse të lidhura me Sorosin dyshohet se kanë koordinar aktivitet politik për të mbështetur Mamdanin, duke përdorur fonde bamirësie në vlerë mbi 40 milionë dollarë për qëllime elektorale.

Raporti pretendon se këto fonde, të cilat duhej të ishin përdorur për projekte sociale, janë përdorur në mënyrë të maskuar për fushatë politike, duke ndihmuar Mamdanin të ndërtonte një lëvizje që në pamje të parë dukej si “organike” dhe “nga baza”.

Grupi i Sorosit ka hedhur poshtë akuzat, duke i cilësuar si “të mbushura me pasaktësi dhe dezinformata”.

“Grantet që përmenden – shumë prej të cilave ishin destinuar për kauza të tjera në vende të ndryshme – janë dhënë vite përpara se të niste gara për kryetar bashkie,” tha për Daily Mail një zëdhënës i Fondacionit të Shoqërisë së Hapur, që aktualisht drejtohet nga Alex Soros, djali i themeluesit George Soros.

Hetuesi Antar: “Një makineri politike që përdor kodin tatimor si armë”

Sipas hetuesit të mashtrimeve financiare Sam Antar, i cili ka kryer hulumtimin për raportin, organizatat e lidhura me Sorosin mund të kenë shkelur ligjin federal të taksave.

Antar, ish-kontabilist dhe tashmë bashkëpunëtor i qeverisë amerikane në hetime për mashtrime ekonomike, tha për Daily Mail se “ajo që u zbulua ngjan me një makineri të sofistikuar politike që ka përdorur kodin tatimor si armë për të prodhuar një kandidat fitues”.

Ai e përshkroi Mamdanin si “një produkt të asaj makine”, duke shtuar se organizatat e përjashtuara nga taksat “ndihmuan në financimin e aktiviteteve që imitonin një fushatë bazë, përfshirë fushatat derë më derë dhe mobilizimin e të rinjve vullnetarë”.

Vija e hollë mes bamirësisë dhe politikës

Sipas ligjit tatimor amerikan, një organizatë mund të financojë vetëm për qëllime jopartiake, siç janë avokimi për çështje publike apo edukimi qytetar.

Megjithatë, përdorimi i këtyre fondeve për mbështetjen e një kandidati të caktuar është i ndaluar me ligj – një vijë e hollë ligjore, e cila shpesh është e vështirë për t’u provuar pa dokumente të brendshme apo komunikime që dëshmojnë qëllim politik.

Nga ana e tij, ekipi i Mamdanit ka këmbëngulur se fushata e tij është “produkt i mbështetjes nga baza”, e ndërtuar me “donacione të vogla dhe aktivizëm qytetar”, duke mohuar çdo lidhje me fondet e Sorosit apo me ndonjë burim të parregullt.