SHBA miraton vaksinën Pfizer/BioNTech, Trump: Nisim brenda 24 orëve

Administrata Amerikane e Ushqimit dhe Barnave ka autorizuar vaksinën e koronavirusit Pfizer-BioNTech për përdorim urgjent.

Agjencia tha se autorizimi ishte një "moment historik" në këtë kohë pandemie, e cila mori më shumë se 295,000 jetë në SH.B.A.

Vaksina, e cila ofron mbrojtje deri në 95% kundër Covid-19, u konsiderua e sigurt dhe efektive nga FDA, shkruan BBC.

Pesidenti Donald Trump tha se vaksinat e para do të ndahen "në më pak se 24 orë".

"Sot kombi ynë ka arritur një mrekulli mjekësore. Ne kemi shpërndarë një vaksinë të sigurt dhe efektive në vetëm nëntë muaj", tha  Trump.

Para njoftimit të premten në mbrëmje, FDA kishte qenë nën presion të fortë nga administrata Trump për të miratuar përdorimin e vaksinës.

Kreut të agjencisë, Stephen Hahn, iu tha që ta miratojë atë për përdorim emergjent deri të premten ose të hiqet dorë, njoftuan mediat amerikane, megjithëse ai e quajti këtë "të pavërtetë".

Sekretari i Shëndetit dhe Shërbimeve Njerëzore, Alex Azar, u tha gazetarëve më herët të premten se departamenti i tij do të punonte me Pfizer për të filluar programin e vaksinimit masiv nga e hëna ose e marta.
Vaksina Pfizer tashmë ka marrë miratimin rregullator në Mbretërinë e Bashkuar, Kanada, Bahrein dhe Arabinë Saudite. Ashtu si ato vende, SH.B.A. do t'u japë dozat e para të vaksinës të moshuarve, punonjësve shëndetësorë dhe ekuipazhit të urgjencës.

Vdekjet nga koronavirusët janë rritur ndjeshëm që nga nëntori në SH.B.A. Të mërkurën, vendi regjistroi më shumë se 3,000 vdekje - totali më i lartë në një ditë të vetme kudo në botë.

Çfarë ka thënë FDA?

"Autorizimi i FDA për përdorimin emergjent të vaksinës së parë Covid-19 është një moment historik në luftimin e kësaj pandemie shkatërruese që ka prekur kaq shumë familje në Shtetet e Bashkuara dhe në botë", tha Hahn.

Ai tha se autorizimi erdhi pas "një procesi të hapur dhe transparent të rishikimit" që siguroi që vaksina të përmbushte "standardet rigoroze, shkencore të FDA-së për sigurinë, efektivitetin dhe cilësinë e prodhimit".