“Është luftë e vërtetë”, mesazhet e fundit të ushtarit të vrarë rus me nënën: Kam frikë, po i godasim të gjithë!

Teksa lufta ruse në Ukrainë vazhdon, bombardimet dhe raketat nuk kanë kursyer asnjë qytetar qoftë ukrainas apo jo. Dëmet e luftës deri tani, nuk janë të lehta as për Vladimir Putin.

Në mbledhjen e djeshme të OKB-së, ambasadori ukrainas Sergiy Kyslytsya ka lexuar mesazhet e një ushtari rus me nënën e tij vetëm pak momente para se të vritej gjatë luftimeve.

Në mesazhet e transkriptuara, ambasadori citon se ushtarëve iu është thënë fillimisht se do të mirëpriten në Ukrainë, por vetë ushtari pohon gjatë bisedës me nënën se në fakt, ukrainasit nuk i kanë mirëpritur dhe i kanë quajtur fashistë.

Teksa, nëna e pyet nëse ndodhet apo jo ende në stërvitje ushtarake, ushtari i ndjerë thotë se është larguar nga Krimeja drejt Ukrainës, duke e përshkruar situatën atje si një luftë e vërtetë.

Mesazhet, të cilat janë verifikuar vetëm nga burime ukrainase, erdhën pasi forcat e presidentit rus Vladimir Putin u akuzuan për vrasjen e një fëmije dhe dy të rriturve duke hedhur bomba në një parashkollor në qytetin e Okhtyrka.

Biseda e ushtarit rus me nënën e tij para se të vritej:

Nëna: Losh, pse nuk je përgjigjur për kaq shumë kohë? A je vërtet në trajnim ushtarak?

Loshja: Mami, nuk jam më në Krime. Nuk jam më në stërvitje.

Nëna: Po ku je atëherë? Babi po pyet se ku mund të të dërgojë një pako.

Loshja: Po çfarë pako nënë? E vetmja gjë që dua tani është të var veten.

Nëna: Për çfarë po flet? Çfarë ndodhi?

Loshja: Nënë, jam në Ukrainë. Këtu po ndodh një luftë e vërtetë. Kam frikë. Ne kemi bombarduar të gjithë qytetet, edhe qytetarët. Na thanë se ata do të na mirëprisnin. Ata po hidhen poshtë tankeve tona për të mos kaluar. Na quajnë fashistë. Nënë kjo është shumë e vështirë.