Si Volodymyr Zelensky mblodhi ukrainasit dhe botën kundër Putinit

Përpara se Rusia të pushtonte Ukrainën, presidenti Volodymyr Zelensky shpesh 'përqeshej' si një politikan komik/komedian që nuk kishte gjasa. Por me ndihmën e mediave sociale, ai është bërë lideri që Ukraina nuk e dinte se kishte nevojë.

I veshur me një bluzë me ngjyrë ushtarake, i parruar dhe i zbehtë, Zelensky ka frymëzuar ukrainasit të luftojnë për vendin e tyre – dhe evropianët ta shohin Ukrainën në një këndvështrim tjetër, si viktimë e agresionit që lufton me guxim për pavarësi, liri dhe demokraci.

Vendimi i Zelensky-t për të qëndruar në kryeqytet, Kiev, ndërsa është nën sulmin rus – dhe vendimi i familjes së tij për të qëndruar në Ukrainë – ka prekur shumë, veçanërisht në kontrast me presidentin afgan, Ashraf Ghani, i cili u largua nga Kabuli sapo talebanët, ishin në periferi, duke demoralizuar atë që kishte mbetur nga ushtria afgane, shkruan "The New York Times".

Ai dhe ekipi i tij kanë përdorur gjithashtu në mënyrë të shkëlqyer, mediat sociale, me fjalimet e pasionuara që tregojnë praninë e tij në rrugët e Kievit duke u bërë virale. Ukrainasit e zakonshëm po raportojnë për ngjarjet në Ukrainë në TikTok dhe disa njerëz po bëjnë video duke përshëndetur Zelensky-n dhe duke treguar ukrainasit duke bërë ç'të munden për të larguar rusët - duke mbushur shishe të destinuara për kokteje molotov, vullnetarë për të luftuar, duke u pajisur me armë automatike dhe duke u zotuar për të mbrojtur vendin e tyre.

Përgjigja e Zelensky-t ndaj një oferte të raportuar amerikane për ta evakuuar atë – “Kam nevojë për municion, jo për një udhëtim” – ka shumë të ngjarë të mbetet në historinë e Ukrainës, pavarësisht nëse ai i mbijeton këtij sulmi apo jo.

Por Zelensky ka frymëzuar gjithashtu liderët evropianë që të bëjnë më shumë për Ukrainën. Duke u shfaqur në ekran gjatë takimit urgjent të samitit të liderëve të Bashkimit Evropian tre ditë më parë, më 24 shkurt, ai mbajti një fjalim pasionant 10-minutësh që nxiti disa liderë ngurrues të miratonin një paketë më të ashpër sanksionesh ekonomike ndaj Rusisë, tha një zyrtar i lartë evropian.

Ndërhyrja e tij do të jetë pjesë e historisë, tha zyrtari që ndodhej në sallë. Ishte shumë emocionuese, drejtuesit ishin thellësisht të prekur.

Heshtja në dhomë ishte mbresëlënëse dhe ndikimi ishte i qartë, shtoi zyrtari, dhe ishte përshtypja e tij se bëri një ndryshim të madh në bindjen e vendeve më ngurruese, si Gjermania, Italia dhe Hungaria, që të bien dakord për sanksione më të ashpra financiare dhe bankare dhe dërgimin e armëve mbrojtëse në Ukrainë.

"Kjo mund të jetë hera e fundit që më shihni të gjallë," tha Zelensky.

Veprimet e Zelensky-t dhe përpjekjet e ashpra të rezistencës nga burrat dhe gratë e zakonshme ukrainase – duke ngadalësuar përparimin rus dhe vullnetarizimi për të luftuar me armë automatike – kanë pasur gjithashtu një ndikim të rëndësishëm në opinionin evropian, thonë zyrtarët evropianë, duke e bërë më të lehtë për udhëheqësit e tyre jenë më të guximshëm dhe të pranojnë më lirshëm refugjatët që vijnë nga Ukraina.