Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Bukuria e gomarit

Politiko 5 Shtator 2017, 21:54

Nga Gentian Gaba

Aksidenti më i fundit që u shënua në brigjet shqiptare, ditën e djelë, një turiste e huaj humbi jetën në një plazh të jugut, më pruri në mendje një fjalë të urtë italiane: “Të kesh bukurinë e gomarit”.

Kuptimi i kësaj proverbe është pak a shumë intuitive për të gjithë ne, i referohet lehtësisë për të qenë i bukur në rini, por, kur vitet kalojnë, bukuria nuk mjafton, lipsen cilësi të tjera. Për “gomerët” – ata kokëfortët – hijshmërija shkon me vitet. Pra, të kesh bukurinë e gomarit do të thotë të jesh vetëm i bukur, por pa asnjë cilësi tjetër.

Do t’u jetë dukur e bukur Shqipëria të huajve që e kanë vizituar në këto muaj vere. E virgjër, e egër, e paeksploruar, një rrëfim nga e shkuara e një bote tjetër. Një kënd Europe ku “Krishti”, me gjithë vlerat qytetëruese, nuk është kthyer më. Rinia dhe risia e brigjeve tona të lashta me ujë të kulluar. Kreshtat e vargjeve malore kanë thirrur me qindra mijëra vizitorë të etur për të soditur bukurinë me të cilën natyra na ka bekuar.

Por bukuria nuk mjafton. Ajo josh për pak kohë, por nuk mund të jetë kurrë një aset pa cilësi të tjera të domosdoshme për të shijuar atë. Turistja çeke që humbi jetën në det, mbytja e dytë në Vlorë në 4 ditët e fundit dhe e njëzet e teta e këtij sezoni turistik, është ilustrimi më i hidhur që dëshmon se diçka nuk shkon me turizmin tonë.

Sigurisht që në 27 vite diçka është bërë. Turizmi kontribuon me 1 miliard euro në GDP-në e Shqipërisë. Sipas Këshillit Botëror të Udhëtimit dhe Turizmit, sektori i turizmit dhe udhëtimit në Shqipëri kontribuoi drejtpërdrejt në ekonominë e vendit në 2016, duke përbërë 127.7 miliardë lekë, domethënë 8.4% të PBB-së së vendit. Në vitin 2016, industria turistike drejtpërdrejt mbështeti 85.500 vende pune. Këshillit Botëror të Udhëtimit dhe Turizmit e projekton këtë numër të rritet me 3.2%. Sipas parashikimit afatgjatë, në 2027 industria turistike do të gjenerojë 244 miliardë lekë, ekuivalente me 10.8% të PBB-së.

Tragjeditë ujore, rrugore, paaftësitë manaxheriale, cilësia e dobët e shërbimit, diskriminime në çmime, problematikat në menaxhimin e mbetjeve, derdhjet e ujrave të zeza në det, infrastruktura e papërshtatshme (rënia e një shkëmbi në rrugën bregdetare të qytetit të Vlorës bllokoi trafikun me orë të tëra për vizitorët e plazheve të jugut), tregojnë se jemi të papërgatitur dhe e të pastrukturuar për një turizëm si industri e mirëfilltë në 365 ditë, me potencial deri 24% të PPB-së që arrin në vendet e rajonit.

Turizmi është një nga shtyllat kryesore mbi të cilin duhet të mbështetet zhvillimi ekonomik i Shqipërisë. Kjo kërkon një qasje serioze. Kërkon që të mos merret si e mirëqenë dëshira e të huajve për të zbuluar bukuritë tonë, por të punohet për të krijuar kushtet e nevojshme për një turizëm cilësor dhe të sigurtë.

Ministria e Turizmit dhe e Mjedisit, krahas një koordinimi në nivel qeveritar për ndërhyrjet në sektorin e turizmit, duhet të përqendrohet te standardet turistike, për promovimin turistik, botimet, guidat, standardet në planifikimet e zonave turistike dhe për ndërtimet, certifikimin e hoteleve, venien në siguri të bregdetit, kalendarin e aktiviteteve, panairet ndërkombëtare e kombëtare. Vëmendje i duhet kushtuar nivelit të cilësisë së shërbimit në parqet turistike dhe në muzetë që janë pjesë e këtij institucioni; informacionit turistik; politikave të zhvillimit të sektorit, harmonizimit me sektorin privat; me pak fjalë rritjen e standardeve në turizëm. Nëse nuk do të kemi një qasje strategjike ndaj këtij sektori jetik për zhvillimin tonë, shumë shpejt “bukuria e gomarit” do të venitet, do të mbetemi vetëm një vend i ashpër për të jetuar dhe pushuar.