Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Çdo shqiptar duhet të sillet sot si opozitar

Politiko 12 Maj 2019, 12:52

Çdo shqiptar duhet të sillet sot si opozitar

Alban DACI

Në një vend demokratik nuk mund të ketë mohim opozite, apo zhdukje opozite, me një të hequr të lapsit. Kushdo që do të mendonte, tentonte apo do të përdorte propagandën, për të mohuar opozitën, nuk do bënte gjë tjetër, veçse do të kontribuonte në një rrugë pa kthim, për çuarjen e vendit drejt një situate të vështirë. Shpresa për të mohuar ekzistencën politike të PD ishte një ogur i zi dhe një përgjegjësi për të çuar vendin drejt nje përballje të ashpër e me pasoja për rendin, demokracinë dhe shoqërinë.

Ndoshta, për fat të keq, jemi përsëri në situatën e një fundi të dobishëm, sesa në padobinë e pafundme.

Opozita nuk e ka mohuar për asnjë çast mosmarrjen pjesë në zgjedhje, nuk ka pretenduar të marrë pushtetin pa zgjedhje, por ka kërkuar që, para së gjithash, të ketë kushte normale për zgjedhje të lira e demokratike. Sot, vendi është përballë histerisë kolektive të ndikuar nga e keqja. Lotët e disa politikanëve, gazetarëve, ngjajnë me lotët e qytetarëve në ditën e vdekjes së Diktatorit. Shumë hipokrizi, frikë e pak vetëdije qytetare e sinqeritet.

Opozita, me prova e me fakte, ka dëshmuar dhe ka nënvizuar se, në kushtet aktuale dhe me personazhet aktualë nuk mund të ketë zgjedhje demokratike. Reagimet e opozitës dhe lënia e mandateve prej saj nuk janë kundër demokracisë, por sakrifica reale për demokracinë. Listat e ndryshuara nga PS për kandidatët bashkiakë dëshmon, se PD ka pasur te drejtë në pretendimet e saj dhe mjafton të marrim rastin e moskonfirmimit të Vangjush Dakos.

A mund të na japë qeveria një përgjigje përse vendosi të mos e konfirmonte Dakon? Po ashtu, vendosja në listë e emrave që akuzohen për blerje votash, korrupsion e shpërdorim detyre, rikonfirmoi faktin, se PS nuk do të distancohet nga krimi elektoral. Përkundrazi, PS vazhdon të dëshmojë, se krimin elektoral e ka si mjet të vetëm, për të rimarrë pushtetin dhe për ta lënë në shërbim të elementëve antidemokratikë. Krimi dhe demokracia nuk mund të bashkëjetojnë së bashku. Nëse bëhen bashkë, demokracia ka pranuar nënshtrimin, për të legjitimuar krimin.

Sot, disa media e gazetarë në shërbim të pushtetit, i cili ka qëllim dhe është bërë mburojë e së keqes e po ashtu edhe disa politikanë të rinj që, në fakt, duhet të jenë miq të vërtetës dhe demokracisë, po aludojnë se opozita po prish qetësinë e qytetarëve si ditë e shtunë, që ishte. Por, mirë, more, çfarë mund të ndodhte me qytetarët nëse nuk do të reagojnë sot? Çfarë e pret Shqipërinë, nëse PD nuk merr pjesë në zgjedhje? Si mund të jetë Shqipëria pa pjesëmarrjen e opozitës në zgjedhje? Ndoshta, Shqipëria do jetë më keq se Venezuela e me keq se edhe Kuba.

Dëgjojmë deklaratat e ndërkombëtarëve, të cilët janë rritur në vende ku të inkriminuarit, trafikantët, nuk bëjnë politikë e nuk hyjnë në Parlament! Prandaj, ata nuk mund ta kuptojnë realitetin, se çfarë do të thotë të jetosh në një vend si Shqipëria.

Opozita, me të drejtë, ndoshta, është një kontekst ndryshe nga kontekstet europiane, por edhe vetë Shqipëria është një vend me një qeveri krejtësisht jashtë çdo konteksti europian.

Në Shqipëri po shkohet drejt një situate, ku e keqja pasqyrohet si monopoli më i mirë dhe alternativa e së vërtetës absolute.

Shumica aktuale,duke bërë tentativën e dëshpëruar për të krijuar një opozite false dhe jo reale, e çoi situatën drejt konfliktit dhe përplasjes. Veprimet arbitrare, prepotente e fuqiplote të qeverisë e zhveshën opozitën nga çdo lloj alternative demokratike.

Opozita, në situatën e krijuar, kishte dy rrugë:

- Të pranonte zhdukje, sepse kështu binte rehat pushteti;

- Të luftonte me çdo mjet, për të shpëtuar veten dhe alternativën demokratike drejt një vendi që po shkon drejt një diktature demokratike.

A do të ishim dakord që, në një vend që kërkon të bëhet pjesë e BE, te mos kishte opozitë? A mund të konsiderohen normale zgjedhjet pa pjesëmarrjen e opozitës?!

Në një situatë të kësaj natyre, dikush nga pozita, për hir të demokracisë, duhet të reflektojë e të gjejë arsyen për të rikthyer vullnetin dhe shpresën, për të bërë demokraci.

Si ka mundësi që opozita, të djathtët dhe krejt PD, vlejnë më pak se sa një njeri në pushtet? A janë të gatshëm drejtuesit e PS që, për hir të egos, të çojnë vendin drejt një ngrehine të pamerituar? Çdo lider ka përgjegjësi politike dhe qytetare e për këtë arsye mundet të bëjë një gjest krejt normal të praktikuar në vendet demokratike, duke dhënë dorëheqjen.

Gjithsecili prej nesh, para se të jetë politikan, pushtetar, gazetar, servil, duhet të jetë, mbi të gjitha, qytetar i një vendi, që ka nevojë me shumë se kurrë për frymë e alternativë demokratike.

Sot, përballë një situate, ku sistemi i drejtësisë nuk ekziston, opozita përjashtohet, përbuzet dhe mohohet, atëherë janë të pakta shpresat, se ditë më të mira do të vijnë. Nëse duhet të sakrifikojmë, le ta bëjmë sot, për të mos humbur nesër takimin me historinë. Atëherë, kjo sakrificë nuk është gjë tjetër, veçse një sakrifice për demokracinë.

Opozitës, përballë një shumice me orientim të qartë diktatorial, si dhe me natyrën e dukshme të instalimit të një "demokracie mafioze", nuk i ka mbetur rrugë tjetër, veçse të sillet në atë mënyrë, për të rigjetur një demokraci të vrarë e të lënduar thellë nga një regjim arrogant. Çdo shqiptar duhet të sillet sot si opozitar për të kuptuar atë që, qeveria po bën sot.