Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Çfarë bën Rama tashmë është infotainment*; ndërkombëtarët kundër tij janë lajmi

Politiko 16 Korrik 2020, 18:11

Çfarë bën Rama tashmë është infotainment*;

Alfred Lela

Ka pasur dhe ka përpjekje, përfshirë edhe të autorit të këtyre radhëve, për të interpretuar apo deshifruar lëvizjet politike të kryeministri Rama. Më saktë, më të fundit prej tyre, ngulmimin e tij për të shkuar në fund të legjislaturës me dy ligje-mushkë, të votuara në Kuvend një javë larg njëri -tjetrit dhe shumë afër pikës së thyerjes me faktorin ndërkombëtar.

Edhe pse demotivon gjithë stinën dhe arealin politik me lëvizjet e tij, Rama sërish i ka motivet e veta për këtë. Sidoqë të jetë, në lëvizjet e Ramës, taktike apo strategjike, nuk ka asgjë të re. Eshtë i njëjti Ramë që përsërit veten gjatë gjithë këtyre tre viteve të mandatit të dytë, në përpjekje për të gjetur një fabul, jo vetëm të qeverisjes, por edhe të ripërtëritjes. Duke qenë se nuk e ka gjetur, ai është munduar, deri në kufijtë e qesharakes, të përmbysë realitetin në favor të virtualitetit.

Kur, për shembull, Europa nuk ia hapte negociatat, ai megjithatë trumbetonte hapje në Tuiter dhe festonte në Tiranë me potpuri politike huazuar nga marshimet e Hoxhës për festat e majit apo nëntorit. Kur Europa i vendoste kushte, 3, 6 e me radhë, ai sërish fliste për probleme të brendshme të Unionit që nuk kanë të bëjnë me performancën e Shqipërisë. Kur numri u rrumbullakos, brenda një mallkimi tek, si kushtëzimi i fundit për nisjen e negociatave, kryeministri bënte be e rrufe, se kushte nuk ka, por janë sajesa të medias dhe opozitës.

Kur më vonë mburrej se si qeveria e tij kishte fituar mbi armikun e padukshëm, Covid-19, dhe Europa sërish nuk dakordësohej, duke e lënë vendin e tij dhe tonin brenda kufijve të izolimit kontinental, ai e gjente fajin jo te vetja, por te kalkulimet politike të Unionit. Asnjëherë problem nuk ishte ai, përherë dikush apo diku tjetër.

Ditur këtë kronikë dhe histori, shpjegimi i këmbënguljes së Ramës për ndryshimin e Kushtetutës, jo vetëm pa konsensus, por edhe duke përdorur si të tillë një grusht laraman deputetësh pa përfaqësim real, është pesë me hiç.

Është i njëjti Ramë dhe ne nuk ndihmojmë aspak duke qenë të njëjtët. Kryeministri nuk është më lajm, por informacion. Ai zë vendin e një lajmi dhe trajtohet si i tillë vetëm se zotëron statusin e një zyre të lartë të Republikës dhe në këtë kuptim është i pashmangshëm. Ajo çka është e re në gjithë këtë, dhe përbën lajm, është qëndrimi i faktorit ndërkombëtar. Kryesisht spektatorë dhe miratues aktivë apo pasivë të inkursioneve të tij antidemokratike, diplomatët e huaj në Tiranë, Berlin dhe Bruksel, kanë një qëndrim fringo të ri në raport me kryeministrin shqiptar.

I cili e sheh Ramën si prishës të konsensusit dhe si rritës së klimës së tensionit politik në vend. Opozita shqiptare, në njëfarë mënyre merr edhe një hak të vonë nëpërmjet kësaj zbulese të ndërkombëtarëve në raport me Ramën. Qëndrimi i tij dhe brirët e kryqëzuara me të huajt tregojnë se sa të vështirë e ka patur opozita bashkëjetesën me të në Kuvend dhe se si akti i dëshpërimit dhe kundërproduktiviteti i braktisjes së Kuvendit mund të ketë qenë e vetmja rrugë.

*infotainment-term që përshkruan degjenerimin e medias dhe komunikimit publik në kohët moderne dhe që përbëhet nga bashkimi i fjalëve information (informacion) dhe entertainment (argëtim).