Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Çfarë i mungonte sot Kryeministrit?

Politiko 16 Maj 2018, 14:58

Alfred Lela

Narrativa. Për ta sqaruar, ‘narrativa’ është filli i kuq, apo mesazhi i madh i cili vendoset në krye të komunikimit publik dhe prej tij rrjedhin nën apo minimesazhet. Narrativa, apo mesazhi i madh, është ‘i shenjtë’ për komunikimin politik dhe ngulitja e tij bëhet nëpërmjet përsëritjes së pareshtur, por edhe jehonës së nënmesazheve.

Kryeministri Rama e ka humbur narrative e cila bashkon në një të gjitha mesazhet dhe variablat e tyre, dhe kjo u duk në mbledhjen e sotme të grupit parlamentar socialist.

Fjalimi i z. Rama, të cilin kish zgjedhur ta lexonte në letër, pasqyroi së pari një pështjellim që i ngrinte katet kontradiktë pas kontradikte. Linja kryesore e zgjedhur, dhe madje e lajmëruar që nga Parisi nëpërmjet rrjeteve sociale, ishte ‘ne nuk jemi si ata’. Përkthimi i saktë, që u bë edhe në media apo në studiot televizive ishte “do ta lejojmë ministrin Xhafaj të tërhiqet për të kthjelluar çdo dyshim, të arsyeshëm ose jo”.

Mëngjesin e së mërkurës, kur u përhap lajmi se vëllai i ministrit ishte dorëzuar në Polici, u kuptua se, ndër dy Xhafajt, Rama kishte vendosur të mbante të madhin, duke patur frikë nga dëmtimi i imazhit që mund të shkaktonte largimi i një zyrtari të lartë, por edhe nga kohezioni në parti.

Pavarësisht se shefi i qeverisë ishte munduar ta mbushte me suspansë fjalimin, duke nënkuptuar herë pas here, me anë të pauzave dhe nëntekstit, se ‘do e lëshonte’ ministrin, në fund ai kumtoi se Fatmir Xhafaj nuk kishte arsye, morale as politike, për t’u larguar. Me këtë u dha shenjë edhe socialistëve, të thjeshtë ose jo, të cilët kanë gjetur mënyra për t’i ushtruar presion që të mos ‘i japë Bashës’ dy ministra.

Nëse kuptohet vendimi politik i Ramës dhe mazhorancës së tij, nuk mund të thuhet e njëjta për narrativën apo mesazhin. Mostërheqja e ministrit rrëzon apo nxjerr fals mesazhin e madh që u përpoq të mbillte Kryeministri ‘ne nuk jemi si ata’. Qeveria e mëparshme, nën dritën e skandaleve, që nga erotiket e deri te korrupsioni, ka tërhequr katër ministra (Rusmajli, Pango, Meta, Mediu).

Po kaq i brishtë është edhe mesazhi i dytë kyç ‘fajin e ka Opozita që po mundohet të pengojë integrimin’. Në asnjë rast Opozita nuk e pengon dot integrimin, nëse qeveria i ka dhe i bën mirë punët e veta. Integrimin e pengojnë lidhjet e pushtetit me krimin (parakushtet e Merkelit në Berlin), dhe numri i lartë i azilantëve nga një vend që konsiderohet i sigurt si Shqipëria (ankesë e formuluar në Paris). Integrimin mund ta pengojnë edhe kapitullimet mendore me rrënjë në komunizëm, si ai i kryetarit të Kuvendit, që ‘u futi thonjtë në fyt’ parlamentarëve holandezë duke u kujtuar se nën Enverin nuk kishte shfaqje të huaja si drogë e seks, dhe ato shqiptarët i mësuan në Perëndim.

Në fjalimin e Ramës, si pjesë e mesazhit të humbur (apo dhe linjës logjike), mund të konsiderohet edhe përfundimi se audio-biseda nuk është autentike, që vinte para lajmit se materiali i ishte dorëzuar ekspertizës së huaj (pikërisht për të bërë të mundur një përfundim).

Humbja e narrativës ndodh në momente krize. Siç ka leksione që thonë se çdo krizë kërkon një narrativë, ka një aksiomë sipas së cilës krizat nuk zgjidhen me narrativë.