Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Çfarë do të na thotë Basha me listat?

Politiko 26 Maj 2017, 12:03

Alfred Lela

Lulzim Basha është 'ngujuar' në zyrë. Mbërrin aty në mëngjes herët dhe del në orët e para të mëngjesit tjetër, tregojnë bashkëpunëtorët e afërt. Disa qindra njerëz e kalojnë pragun e asaj dere çdo ditë, në një thuajse 'pelegrinazh', që zgjatet që nga shkallët 'tempullore' të selisë së Partisë Demokratike e derdhet në paradhomën e tij, në ballkone dhe në një tjetër qosh pritjeje, që nuk ka 'pamje' të drejtpërdrejta nga zyra e Kryetarit të partisë.

Ka një muaj që i kërkoj një intervistë, dhe para dy ditësh më priti disa minuta; jo për të folur për Politiko.al por për të më thënë 'Jo'. Takimi ishte mënyra e tij për të më zhgënjyer me mirësjellje. Pa patur nevojë të më sqaronte se sa i zënë ishte. 'Shtatzania' e ditës së tij shfaqej nëpër godinë në formën e kokave që futeshin te dera e asistentes, në kërkim të një kontakti. Në to shfaqej përsëritja, por jo lodhja apo rezistenca.

Të gjitha kokat e pranonin se, pas asaj dere përkufizohej zyra më e rëndësishme e opozitës, dhe një ndër dy më të rëndësishmet në vend. Largohem pa intervistën, por me premtimin e saj. Së shpejti. Dështoj edhe në përpjekjen për të marrë ndonjë dromcë informacioni në lidhje me ndonjë emër në ndonjë listë të kandidatëve për deputetë.

Unë ulem dhe të tjerë ngjiten shkallëve, dhe duket sikur të gjithë rendin drejt atyre listave si drejt një thirrjeje të pashpjegueshme. Lulzim Basha ka në dorë kodin e tyre, të cilin këto ditë ankthi për shumë nga ata që janë në 'listat e pritjes' e presin të futen në 'listat e kandidatëve', ai e ka kyçur edhe më thellë brenda një kodi heshtjeje.

Prej kësaj 'kulle Babeli' ku bëhen bashkë të gjithë trupat, shpirtrat, mendjet e personave që ngjiteshin shkallëve të PD drejt zyrës së Bashës e shumë të tjerëve të joatyshëm, kryetari i Opozitës do të mundohet të nxjerrë një 'gjuhë' të cilën shpreson ta flasin sa më shumë vetë. Duke mos harruar të fusuë aty brenda edhe dialektin e historisë së partisë, të kontributeve, të rinovimit, të një kontrate të re politike, të rezistencës tre mujore në Çadër, e me radhë.

Çfarë do të na thotë Basha me gjuhën dhe trupin e listave të tij? Cila do jetë gjuha e trupit të këtyre listave? Si do shtrihet ky trup në hartën politike të së djathës dhe Shqipërisë?

Nuk e di, por do të doja që:

-Emrat e parë në listë të ishin të rinj (jo domosdo si moshë, por si risi). Duke ia nisur me ta, Basha do mund 'të kamuflonte' disi rezistëncën ndaj personazheve politike që mund të 'bezdisin' publikun, qoftë edhe nëpërmjet përsëritjes.

-Këta emra të ishin në njëfarë mënyre 'Lista Basha', dhe prej tyre të dilte udhëheqësia e qarqeve në imazh, dhe jo domosdoshmërisht në operacionalitet fushate.

-Basha ta prezantonte vetë këtë 12-she në mitingun hapës, apo kur të bëjë publikimin e listave të kandidatëve.

Kjo qasje e krijon premisën e diskutimit të listave 'nga koka', me qëllim krijimin e imazhit të rinovimit dhe të hapjes së partisë ndaj shoqërisë dhe flukseve shoqërore. Në lista do të ketë patjetër edhe 'konjukturë partiake', dhe nuk ka se si të mos ketë. Por, 'publiku i gjerë' pret nga listat e Bashës, sidomos pas fjalorit të dy muajve të fundit, mbushur plot me 'Republikë të re', diçka që del përtej kësaj konjukture.

Kjo është një këshillë nga pozitat e dashamirësisë. Sepse, nga pozitat e cinizmit dhe të armiqësisë, listat do të sulmohen e përgojohen në çdo rast. Sikur edhe me shenjtorë të jenë mbushur. Cilido qoftë kompozimi i tyre, listat do të krijojnë batalionin e të pakënaqurve. Të dy llojshëm do jenë: ata që janë lënë jashtë, dhe ata që nuk janë në pozicione të sigurta, apo vende ku e kanë projektuar veten.

Listat, në të gjitha rastet, do të na përkthejnë gjuhën me të cilën ka vendosur të flasë Lulzim Basha në katër vitet e ardhshme.