Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Desktop - General - 1

KRYESORE

Ç'po mbulon Rama me retorikën 'Basha agjent rus'

Politiko 13 Mars 2018, 10:40

Ç'po mbulon Rama me retorikën 'Basha agjent rus'

All - Paragraf - 1

Fitim Zekthi*

All - Paragraf - 3

Sa më e rëndë të jetë gjendja e një subjekti politik aq më e madhe është nevoja e tij për një armik. Armiku është shpëtimi i vetëm në raste të tilla dhe sulmet ndaj tij kthehen në aktivitetin bazë të subjektit. Në nëntor, në kohën kur çështja ndaj ish ministrit të Brendshëm Saimir Tahiri, i konsideruar ‘ylli më i madh i qeverisë Rama në katër vite’, i akuzuar për trafik ndërkombëtar droge u bë përvëluese, kryeministri Rama doli diku të takonte popullin i veshur si në paradat më ekstravagante të modes, në përpjekje të shmagte vëmendjen. Sado që veshja me brekushe Yamamoto tërhoqi vëmendjen, ajo vdiq shpejt. Atëherë Kryeministri nisi sulmet ndaj opozitës se ajo kishte paguar një kompani lobimi në SHBA dhe nuk kishte deklaruar burimin e parave në KQZ. U bënë emisione televizive, u akuzua PD për pagesa të paligjshme, deputetë të ndryshëm të PS përdorën foltoren e parlamentit për të kërkuar PD para popullit të mbante përgjegjësi. Iu kërkua Prokurorisë të hetonte etj.

Kur halli i PS u fashit disi, për shkak se çështja Tahiri u pengua, u shua edhe sulmi ndaj PD-së. Tani ka disa ditë që sulmi ndaj PD-së është rikthyer shumë më i fuqishëm. Halli është më përvëlues. Janë kapur 613 kg kokainë që vinte nga Kolumbia. Vlera e saj është e tmerrshme. I kalon 100 milionë eurot, dhe për më tepër duket se kemi të bëjmë me një linjë të sofistikuar që nuk ka mundësi të mbahet gjallë pa lidhje thellë në qeveri. Akuzat e PS këtë herë thonë se PD ka lobuar në SHBA nëpërmjet rusëve, është financuar nga rusët etj. Përdoret si burim i këtyre akuzave një artikull i një reviste amerikane, ‘Mother Jones’.

Mother Jones është një revistë e cila qëndron në të majtën më të majtë të spektrit politik, jo vetëm në SHBA. Që kur presidenti Donald Trump ishte në fushatë për fitimin e nominimit brenda parties, kjo revistë ka qenë një kundërshtare e egër e tij. Pasi Trump fitoi zgjedhjet në SHBA e majta, demokratët, liberalët, progresistët, u shokuan, nuk e pranuan kurrë një fitore të tillë. Aty madje shpërthyen në protesta, dogjën goma, thyen dyqane etj. Trump u akuzua për fashist, për nazist, për prorus etj. Mediat, organizata të ndryshme jo qeveritare, think tank-e liberale, komuniste, të majta etj., kudo në botë por sidomos në SHBA, nisën të flasin për rezistencë. Ato rimorën një term të vjetër të të majtës komuniste europiane, atë të rezistencës. Komunistët në Europë, në mënyrë djallëzore përdorën termin ‘rezistencë ndaj fashizmit’ gjatë Luftës së Dytë Botërore, sepse donin të fshihnin bashkëpunimin që ata patën me fashizmin. (Janë të njohura urdhrat e Partisë Komuniste franceze kur u sulmua Franca nga Hitleri që të mos luftohej pasi nazizmi po lufton borgjezinë. Janë të njohura edhe paktet mes komunistëve dhe fashistëve kudo në Europë deri në qershor 1941.)

Narrativa e rezistencës antifashiste vijon të riprodhohet gjithnjë nga e majta sa herë asaj i kërcënohet pushteti politik, ekonomik dhe kulturor. Noah Rothman shkruante pak ditë më parë se ky identitet toksik është një obsesion i vjetër i të majtës që po shfaqet tani. ‘Mother Jones’ është thjesht një ingranazh fare i vogël i kësaj makinerie anti Trump, e cila ka më shumë se një vit që e quan Trump njeri të zgjedhur nga rusët dhe fashist.

Partia Socialiste shqiptare e ka marrë artikullin e kësaj gazette, i cili aludon se rusët janë pas lobimit të Partisë Demokratike, duke e financuar atë madje. Pavarësisht akuzave nga e majta, dhe pavarësissht hetimeve të thella në SHBA, nuk është gjetur asnjë lidhje e Presidentit Trump me rusët në fushatën e zgjedhjeve. Por, Partia Socialiste, duke e ditur ndjeshmërinë e SHBA ndaj çështjes ruse, mendon se ka gjetur mjetin e duhur për të sulmuar PD, me idenë se kjo gjë do të bëjë të harrohet çështja e kokainës dhe PD do të vihet në vështirësi. Ligji amerikan i kontrollit të financimeve është më i thukëti ligj në botë. Është e pamundur që të hyjnë para në SHBA të cilat të jenë para të interesave ruse, para që duan të dëmtojnë interesat amerikane me anë të lobingjeve. PS dhe Rama me kohë i janë bashkuar atij kori ndërkombëtar (kulturoro-ideologjik) zërash që e quan presidentin Trump fashist dhe të ndihmuar nga rusët. Në këtë rast ajo që ka shkruar revista ‘Mother Jones’ nuk është vetëm në një linjë me qëndrimin e PS, por i shërben edhe hallit të tyre për të shmangur vëmendjen nga çështja e kokainës.

Në qoftë se do të ishte shqetësimi te transparenca e financimit të partive, atëherë PS dhe Rama nuk do të kishin qenë autorë të një lobimi sa të turpshëm aq edhe të paligjshëm ku kryetari i PS, Rama mori pjesë në një takim për mbledhje fondesh të presidentit Obama i ftuar si “gruaja e Bilalit”. Pagesa e kryer atje u bë objekt i hetimit nga FBI. Gjithashtu, në qoftë se do të ishte shqetësimi te financimet jo transparente, PS dhe Rama do të kishin patur një përgjigje tjetër dhe një sjellje tjetër me mbjelljen e hashashit, me paratë e tij dhe me financimet që kryejnë këto para. Në qoftë se do të ishte shqetësimi te transparenca e financimit, PS dhe Rama do të duhet të besonin te Departamenti i Thesarit në SHBA i cili nuk mund të ligjërojë para që vijnë kundër ligjit. Në qoftë se do të kishte shqetësimin e ndikimit apo finacimit rus kundër interesit amerikan, atëherë PS dhe Rama do të duhet të dinin se, atë më shumë se kushdo tjetër e heton vetë SHBA, e mbron FBI, presidenti Trump dhe institucionet e tjera atje.

Sigurisht, Rusia duke qenë një vend i madh lufton për ndikim edhe në rajonin tonë. Ajo është në një lloj lufte të re të ftohtë me SHBA. Ajo ka ndikim në Serbi, përpiqet të ketë ndikim në Rumani, në Mal të Zi, në Maqedoni apo Bullgari. Është vënë re gjithashtu përpjekja për të qenë më e pranishme në Shqipëri me anë të ndonjë investimi minor, rritjen e lehtë të shkëmbimeve tregtare apo ardhjes së turistëve etj. Orientimi ynë politik është pa mëdyshje kah SHBA dhe BE. Nuk ka subjekt që mund të bëjë një vetëvrasje të tillë që të shtyjë përpara axhendën ruse. Akuza që bën PS, se PD apo Basha ka pranuar financime ruse është thjesht idiote. Nuk ka mendje normale që të besojë se Lulzim Basha po pranon të bëhet njeriu i rusëve në Shqipëri, po pranon të punojë për interesa ruse kundër atyre amerikane apo europiane. Këtë mund ta thotë vetëm ndonjë deputet socialist që nuk merr në konsideratë veten e tij kur flet. Në Partinë Socialiste, e cila është trashëgimtare e Partisë së Punës, ka nostalgji për Bashkimin Sovjetik, ka njerëz dhe funksionarë që e kujtonjë me emocion kohën e Bashkimit Sovjetik, por edhe ata nuk guxojnë të bëhen njerëz që vihen në përdorim të Rusisë. Madje, as ndonjë ish-spiun i shërbimit të Bashkimit Sovjetik që është sot në PS ose që ka familjarët e tij në PS, nuk e bën dot. Përderisa këta nuk e bëjnë dot, Lulzim Basha që nuk ka patur ndonjë lidhje kurrë me BS nuk mund ta bëjë.

Gjithë ky debat qesharak që ka ngritur PS duhet të marrë fund. Nuk mund të kalojë qeverisja e vendit vetëm duke bërë propagandë dhe vetëm duke ‘sulmuar armikun’. Ka disa gjëra për të cilat edhe shërbyesit më të mëdhenj në media të Ramës duhet të ndalen, të marrin frymë dhe të mendojnë se atij nuk mund të shërbehet verbtazi edhe kur në Shqipëri hyjnë mbi 100 milionë euro kokainë. Bëhet fjalë për një ndryshim paradigmatik të mënyrës së qeverisjes, bëhet fjalë për një pushtet të frikshëm si ai i trafikut ndërkombëtar të kokainës nga i cili nuk del as qeveria vetë. Kjo nuk është një çështje e Ramës dhe e mbrojtjes së Ramës përballë Bashës. As një çështje e mbrojtjes së Bashës. Kjo është një çështje shumë e madhe që ka pasoja me vite, edhe pasi të ikë Rama.