Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

‘Dëshmitari X’ dhe 4 skenarë të pushtetit për ‘grusht shteti’

Politiko 17 Maj 2018, 20:33

‘Dëshmitari X’ dhe 4 skenarë të pushtetit për

Alfred Lela

Një dëshmi e Albert Veliut, vlonjatit të njohur për disa ditë si ‘dëshmitari X’, megjithëse, në pamje të parë, duket si pokeri politik i ngjashëm me ‘përgjimet maqedone’ (të cilat, dalë-nga-dalë çuan në rrëzimin e Nikola Gruevskit), mund të jenë diçka më shumë për një vend si Shqipëria, që ka në indin e vet një natyrë më të trazuar të shtetit dhe të marrdhënieve me të.

Shumica e majtë ka pushtetin në Shqipëri, ndërsa opozita pretendon pozicionin e forcës që kërkon kthimin e shtetit brenda hullisë dhe kuptimit të vet. Secila palë politike imagjinon skenarët e vet. Opozita prej 5 vjetësh ka platformë kryesore dekriminalizimin, të cilin e ka shtyrë përpara me forcë dhe jo pa sukses, ndërsa shumica ka rezistuar dhe propaganduar se është ajo që ‘po bën shtet’. Ngjarjet, sidomos ato ku përfshihen dy ministrat e Brendshëm socialistë, tregojnë se molepsja është më e thellë se perceptimi i krijuar.

Skenari i parë që do të përpunojë ‘qeveria Rama’ është diskreditimi publik i ‘dëshmitarit X’. Në një praktikë të zakonshme të ndjekur në litigimin gjyqësor, për Albert Veliun do të gërmohet deri në pikën e fundit të së zezës. Ky koncert delegjitimimi do të luhet në platformën e medias proqeveritare dhe në zyrën e propagandës së Kryeministrit, ku do të gatuhen qëndrimet dhe deklarat për shtyp.

Albert Veliu do të pësojë atë që quhet ‘vrasje karakteriale’.

Skenari i dytë është trysnia e Prokurorisë për ‘tre musketierët’ (dhe të tjerë) që kanë kuruar denoncimet e ministrit Xhafaj dhe të vëllait: Salianji, Bardhi, Alibeaj. Nuk është çudi që, për ndonjërin prej deputetëve të kërkohet heqja e imunitetit, në mënyrë që ‘t’i hapet rruga hetimeve të pandikura’, një gjë qesharake kjo po të kujtosh rezistencën për mandatin e Tahirit, por edhe faktin se Prokuroria është tashmë një levë xhelatinoze.

Skenari i tretë, i nisur që në krye, në të cilin është përfshirë edhe Kryeministri, është dyshimi i autenticitetit të audios dhe të videos. Ky skenar do të zgjerohet edhe më, duke u munduar të ridikulizohet (përqeshet) dëshmitari, dëshmia dhe grupi që e ka siguruar atë. Një teknikë e tillë u përdor edhe në rastin ‘Tom Doshi’, dhe jo pa sukses.

Një skenar i katërt është përpjekja për të joshur, blerë dhe frikësuar të gjithë ‘garniturën’ shoqërore të ‘dëshmitarit X’, të afërmit, të njohurit, bashkëpunëtorët, në mënyrë që të prodhohen anti-dëshmi të cilat, me habinë e së resë të hedhin dyshime dhe harresë mbi thelbin e dëshmisë themelore.

Të gjitha këto bashkë përbëjnë atë që mund të konsiderohet si ‘grusht shteti’ i pushtetit ndaj institucioneve. Pasi ka molepsur shtetin me krimin, pushteti kërkon të bëjë injeksionin e fundit, ta konsiderojë si normale këtë çiftim monstruoz.

Albert Veliu, apo ‘dëshmitari X’, ka bërë një shërbim publik dhe është një prej mekanizmave të çuditshëm që demokracia prodhon për të shpëtuar vetveten. Fabula e tij është e thjeshtë dhe ka brenda një instinkt njerëzor, atë të besnikërisë dhe të hakmarrjes. Një bashkëpunëtor i Xhafajt në narkotrafik, ai thotë se pasi ra në burg, Agroni nuk u kujtua t’i çonte as një paketë cigare.

Një lloj Monte Kristoje nga Vlora, ai ka një epërsi mbi njerëzit që ka zgjedhur të sfidojë: nuk ka asgjë për të humbur dhe e ka bërë burgun e vet. Tani ai kthehet me hakmarrjen dhe kërkesën që edhe të tjerët të bëjnë burgun e tyre.

Shteti nuk ka pse të bëhet roman i Dymasë, por në betejën mes plebeut dhe patricit të krimit, i takon të jetë në anën e më të voglit.

Në mos, ai është vetëm pushtet dhe vetëm kriminal.