E kritikuar ashpër, si e mbrojnë ministrat e Ramës amnistinë fiskale

Projektligji për aministinë fiskale ka marrë kritika nga ekspertët vendas, opozita shqiptare, por edhe nga ndërkombëtarët. Së fundmi shqetësime për të ka ngritur Dhoma Gjermane e Tregtisë, ndërsa më herët ajo Amerikane.

Ndërkohë qeveria vijon hapat drejt miratimit. Kryeministri Edi Rama thirri një takim me përfaqësues nga bizneset për të diskutuar rreth kësaj nisme.

Ministrat e tij, Delina Ibrahimaj dhe Arben Ahmetaj e mbrojtjën këtë projektligj, duke mohuar se do t’i shërbejë pastrimit të parave. Ministrja e Financave deklaroi gjatë aktivitetit se do të krijohet një njësi speciale që do të ndërveprojë me institucionet shtetërore. Brenda 5 ditësh kjo njësi do të analizojë kërkesat nga subjektet dhe do të japë një vërtetim për pagesën e një tatimi të posaçëm.

“Është parashikuar një kufi prej 2 mln eurosh për deklarimin e pasurisë. Do të krijohet një njësi speciale që do të ndërveprojë me institucionet shtetërore që kanë si objektiv elementët që sapo paraqita. Për 5 ditë do të analizojë kërkesat nga subjektet duke ndërvepruar me institucionet shtetërore në luftën kundër krimit.

Administrata do të japë një vërtetim që bizneset të paguajnë një tatim të posaçëm për legalizimin e kapitaleve. Është 7% për 4-mujorin e parë të zbatimit të ligjit dhe 10% për 5 mujorin e dytë. Në fund të verifikimit do të dalë një certifikatë që legalizon këto para apo asete. Shumë prej jush kanë pyetur pse tani dhe pse në këtë formë”, u shpreh ajo.

Ndërsa Ahmetaj tha se personat e dënuar jashtë vendit janë të përjashtuar nga deklarimi vullnetar ndërkohë do të bëhen verifikimet e nevojshme sa i takon prezumimit të pafajësisë.

Ai theksoi se të përjashtuar do të jenë zyrtarët e lartë dhe të mësëm, politikanët dhe familjarët e tyre, individët e skeduar për rekorde kriminale si dhe subjektet e OFL.

“Do ta kuptoni që personat e dënuar janë të përjashtuar nga deklarimi vullnetar. Përjashtohen individët e skeduar globalisht me rekorde kriminale dhe subjektet e OFL të verifikuar dhe pa verifikuar. Pasuritë e amnistuara nuk mund të transferohen jashtë vendit për 5 vite. Si e theksova të gjithë zyrtarët dhe funksionarët e lartë. Pasuritë e deklarueshme që është  shumë e rëndësishme.

Tatimi i posaçëm është 7% në 4 muajt e parë.. Kjo ka të bëjë me urgjencën që kemi ne si qeveri dhe ekonomia sa më parë për të parë atë pjesë që e i takon buxhetit për shkak të merakut që ka kryeministri për të parë të materializuar pasurinë për shkak të valës së invazionit rus.

2 mln euro nuk është kufiri vetëm për individin por për të gjithë certifikatën familjarë. Paratë nuk mund të tërhiqen deri në zbatimin e ligjit. Kamatvonesat për deklarimin e pasurisë falen nëse kryhet regjistrimi. Afati i zbatimit është 9 muaj”, tha ai.

Kujtojmë se me këtë nismë parashikohet që të legalizohen pasuritë e padeklaruara, nga pasuritë e paluajtshme, te paratë, monedhat virtuale, sendet me vlerë si dhe instrumente të tjerë financiare.

Kufiri për deklarimin vullnetar të pasurisë do të jetë deri në 2 milionë euro të cilat më pas do të tatohen në masën nga 7 deri në 10%.

Nga kjo amnisti do të përfitojnë shtetasit e Republikës së Shqipërisë, pavarësisht nëse janë apo jo rezidentë tatimorë, si dhe personat juridikë e fizikë, tatimpagues në Shqipëri.

Ndërsa sipas projektligjit do të përjashtohen nga kjo amnisti zyrtarë të lartë si Presidenti, deputetë, kryeministri e funksionarë të tjerë. përfaqësues të pushteti gjyqësor, gjykatës e prokurorë, si dhe drejtues të institucioneve të tjera shtetërore.