Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

I gatshëm të garojë për Bashkinë e Tiranës, Gert Bogdani: Nëse lidershipi e vlerëson, nuk them jo!

Politiko 2 Shtator 2021, 14:41

I gatshëm të garojë për Bashkinë e Tiranës, Gert

Në listën e anëtarëve të rinj të Kryesisë së Partisë Demokratike, Gert Bogdani ka qenë më i votuari mes 10 kandidatëve meshkuj.

Në një intervistë për Panorama, Bogdani shprehet se emri i tij është propozuar nga anëtarët e Këshillit si kandidat për Bashkinë e Tiranës në zgjedhjet e ardhshme lokale. Ai është shprehur i gatshëm që nëse kreu i demokratëve, Lulzim Basha e shikon të arsyeshme kandidimin e tij, nuk do t’i thoshte jo.

“Sfida më e rëndësishme e radhës e Partisë Demokratike janë pa diskutim zgjedhjet lokale në tërësi e ato për Bashkinë e Tiranës në veçanti. Ka ardhur koha t’i jepet fund keqqeverisjes, sidomos asaj të kryeqytetit, që ka vështirësuar jetën e çdo qytetari, të djathtë e të majtë! Në këtë kuadër dhe duke marrë parasysh faktin se gjatë procesit të propozimeve nga baza pjesa më e madhe e anëtarësisë së Tiranës e kanë propozuar emrin tim për Bashkinë e Tiranës, nëse lidershipi i PD-së do ta vlerësonte të arsyeshme këtë gjë, pa diskutim që nuk do t’i thosha jo kësaj sfide”, tha Bogdani.

Vitet e fundit Bogdani nuk ka pasur një post drejtues ne radhët e demokratëve. Ai shprehet se pavarësisht pozicionit do të punojë fort dhe do të jetë më aktiv në jetën politike.

“Pavarësisht pozicionit apo jo, unë besoj fort se puna reale duhet të jetë në bazë dhe pranë anëtarësisë dhe qytetarëve, dhe kjo ka qenë e vazhdueshme e pa ndërprerje. Besoj se politika ka dy komponentë të rëndësishëm: prezencën në terren dhe prezencën publike. Ndërkohë që kjo e para ka qenë pa ndërprerje, besoj është koha për të shtuar edhe të dytën”, është shprehur Bogdani.

Për të sjellë një parti më të fortë, Bogdani theksoi se është e nevojshme zvogëlimi i detyrave dhe përgjegjësive, çka do të rritë efikasitetin në punën e partisë.

“Jam i mendimit që një ekip më i gjerë sjell një parcelizim më të madh, pra një zvogëlim të detyrave dhe përgjegjësive e për rrjedhojë, një efikasitet më të madh. Është skemë e njohur dhe e përdorur gjerësisht nga partitë tona simotra nëpër botë dhe nuk ka për qëllim kënaqësitë e njërit apo tjetrit, por rritjen e efikasitetit dhe eficencës së punës dhe rezultateve”, ka thënë Bogdani.

Kryesisë së PD-së do t’i mungojnë Kadilli, Nishani e Shehaj. I pyetur nëse partia hakmerret me ata komponentë që dalin kundër lidershipit, Bogdani u shpreh se anëtarët e Kryesisë nuk u zgjodhën nga Basha, por nga kolegët që mendojnë se mund të përfaqësojnë ekipin.

“Dje nuk votoi lidershipi i Partisë Demokratike, në sensin e ngushtë të fjalës, por anëtarësia e gjerë e Këshillit Kombëtar. Një proces i hapur ku çdo votë është numëruar rigorozisht, ndaj nuk do ta shihja si një proces hakmarrjeje, por si një proces ku anëtarët kanë zgjedhur ata që mendojnë se duhet t’i përfaqësojnë në ekipin e kryesisë së re”, përfundon Bogdani.