“Kushte, kushte, kushte…”/ Rama: Nuk janë 15, vetëm njërin nuk e ka plotësuar Shqipëria

I ftuar në “Politik On” në RTV Ora, kryeministri Edi Rama mohoi se për çeljen e negociatave me BE-në Shqipërisë i janë vendosur 15 kushte.

Sipas tij, i vetmi kusht për Shqipërinë është ajo e Gjykatës Kushtetuese funksionale, edhe kjo sipas tij e padrejtë.

Kryeministri shtoi se, kushte do të ketë deri në fund të procesit të integrimit, ndërsa shtoi se problem janë disa shtete që për arsye të politikave të brendshme nuk japin “Ok”-in.

Edi Rama: “Nuk kanë qenë kurrë 15. Që të jemi të qartë. Gjithë procesi deri në fund, deri në ditën e fundit, sa do zgjasë, është një proces kushtesh për të plotësuar. Në çdo hap, në çdo konkluzion,  në çdo progres-raport, në çdo përfundim të Këshillit Europian do të ketë kushte, kushte, kushte… Duke pritur që i gjithë shteti, të gjitha pjesët  e shtetit të jenë konform kornizës europiane. Nuk është kjo se kushte do kemi në vazhdimësi. Por ju solla shembullin e Maqedonisë së Veriut, shihni çfarë i ndodhi. Del një shtet anëtar dhe ve një kusht ai. Dhe thotë duhet të zgjidhim një herë të vëretën historike pastaj ne ti japim “Ok”-in. Që do të thotë, ky është një proces i mbushur me surpriza. Ajo që e bën procesin të paparashikueshëm dhe të fajshëm nga këndvështrimi im, dhe këtë e kam thënë në mbledhje me të gjithë liderët europianë dhe nuk e kam problem ta them edhe këtu, është që për arsye të brendshme vende të caktuara venë kushte të tyre. Dhe këtu është problemi themelor.

Ka vetëm një kusht që Shqipëria nuk e ka plotësuar sot. Një kusht që në mënyrë interpretative., që është kusht i Gjykatës Kushtetuese funksionale, që është një kusht i vendosur padrejtësisht në këndvështrimin tim për arsye se ne nuk na mungon Gjykata Kushtetuese për mungesë vullneti, por Gjykata Kushtetuese na ka munguar për njhë kohë relativisht të gjatë si pasojë e një pastrimi shumë të thellë bërë nga Vettingu, ku rrugës kemi humbur 8 nga 9 gjykatës.