Nga e enjtja kudo me detyrim / Deklaratat e bujshme të Edi Ramës kundër mbajtjes së maskave: Mos harxhoni lek kot, të panevojshme jashtë  

Paraditen e së shtunës, kryeministri Edi Rama komunikoi vendimin e ri të qeverisë në sajë të situatës së krijuar nga pandemia Covid-19, që e ka përfshirë vendin që prej marsit të këtij viti.

Nga e enjtja, maskat do të jenë të detyrueshme për të gjithë, kudo, në mjedise të mbyllura dhe të hapura, përveç shtëpisë.

Rama sqaroi se ky akt normativ nëse nuk zbatohet, për shkelësit parashikohet masë ndëshkimore me gjobë, nga Policia e Shtetit dhe ajo Bashkiake, që do të faturohet në fund të muajit bashkë me energjinë elektrike.

Që prej të shtunës, pati reagime të shumta për këtë vendim, detajet e së cilës do të bëhen të ditura të mërkurën, pasi siç sqaroi kreu i qeverisë, pritet të ketë edhe përjashtime.

Sipas Ramës, kjo masë do të hyjë në fuqi me qëllim parandalimin e një mbyllje të dytë, për shkak të ndikimit stinor edhe nga virozat e vjeshtë-dimrit.

“Me futjen e gripit, mund të kemi pasoja të forta që mund të na detyrojë përsëri, gjë që jam i fundit që e dëshiroj. Të mbledhim mirë mendjen dhe maskë kudo përveç se në shtëpi. Aman mos na çoni prapë në tunelin e karantinës së përgjithshme sepse kostoja e të gjithëve është e pamerituar për shumicën që respekton rregullat. Një karantinë e përgjithshme e dytë do të ishte tejet e vështirë për vendin, ekonomitë e shumë familjeve dhe shtetin”, deklaroi kryeministri në fjalën e tij, krah së cilit ishte edhe ministrja e Shëndetësisë, Ogerta Manastirliu, të cilët përsëritën disa herë vendimin e ri se mbajtja e maskës nga të gjithë, kudo ndodhen, do të ulë me rreth 60% përhapjen e infeksionit.    

Megjithatë, ky vendim i Ramës që ka ndeshur tashmë edhe në kontestimet e para ende pa u vënë në zbatim, bie ndesh me vetë deklaratat e kryeministrit, muaj më parë në media, në postimet e rrjeteve sociale ku ai është shumë aktiv, por edhe në Kuvend.

Kujtojmë se Rama ka apeluar vazhdimisht mbajtjen e maskave, por jo në ambiente të hapura.

 “Mirëmëngjesi dhe me lutjen për mbajtjen e maskës në mjedise të mbyllura, që të mbroni veten, familjen, të afërmit dhe të tjerët rreth jush, ju uroj një ditë të mbarë”, shkruan Rama në një postim në 29 korrik në fb.  

Ndërkohë, më herët, në seancën e 2 marsit në parlament, kryeministri deklaronte me zë dhe figurë që qytetarët të mos alarmohen nga lajmet për koronavirusin, madje u bënte thirrje edhe të mos shpenzojnë para për të blerë maska pasi sipas tij nuk i shërbejnë njerëzve të shëndetshëm.

“Vetëm 2,3% e të prekurve kanë humbur jetën, ndërkohë që 97,7% e përballon pa pasoja për jetën. Kjo duhet mbajtur mirë parasysh, pasi fjala vdekje dhe lajme për të vdekurit janë shumë më shumë sesa fjala shërim dhe lajme për të shëruarit. Mos harxhoni lekët me maska, nuk i shërbejnë njerëzve të shëndetshëm. OBSH ka thënë se maskat i duhen vetëm të sëmurëve dhe mjekëve që i shërbejnë atyre”, shtoi kreu i qeverisë.

Në 18 mars, Rama përcolli këshillën e radhës për qytetarët, ku shkruante se maskat janë të dëmshme për personat të cilët nuk janë të sëmurë.

Po ashtu, edhe në një takim me mjekët e QSUT-së në 25 gusht kryeministri jepte “leksione” se maskat nuk janë aspak të nevojshme në ambient të hapur, nëse ruhet distanca.

Madje, ai i referohej edhe disa vendeve perëndimore që nuk e mbanin më maskën asokohe.