Nga eurobondi te garancia sovrane dhe krijimi i Agjencisë së Sigurisë/ Vendimet e reja të qeverisë

Pas përfundimit të mbledhjes, qeveria ka njoftuar vendimet e reja duke filluar nga procesi i rindërtimit, te menaxhimi i krizës energjetike, eurobondi dhe krijimi i Agjencisë së Sigurisë.

Zëvendës kryeministri Arben Ahmetaj njoftoi se kanë përfunduar të gjitha shkollat e dëmtuara nga tërmeti i 26 Nëntorit dhe tashmë i kalojnë nën administrimin e bashkisë. Ahmetaj deklaroi se në prag të 2 vjetorit nga tërmeti shkatërrues, do të shpërndahen 1050 apartamente dhe njësi individuale.

Sa i përket shpërndarjes së bonuseve, Ahmetaj tha se do të behët me lista prioritare ndërsa pjesa tjetër me short publik.

“Një vendim shumë i rëndësishëm sapo filloi. Procesi i kalimit të shkollave në pronësi të bashkive, përfundim i një numri të madh të shkollave të rindërtuara që i kalojnë qytetarëve dhe bashkive për administrim. Shpërndarja sipas listës prioritare që janë familje me ndihmë ekonomike, nëna kryefamiljare, apo policë të vrarë. Shpërndarja bëhet menjëherë për këto familje kurse për të tjerët do të bëhet me short publik. Mes 20-26 nëntorit do të shpërndahen 1050 apartamente dhe njësi individuale,” deklaroi Ahmetaj.

“Është marrë vendimi për ofrimin e garancisë sovrane për të vënë në dispozicion 10 miliardë lekë për të mbrojtur familjarët dhe bizneset e vogla nga kriza energjetike”, njoftoi ministrja e Energjisë dhe Infrastrukturës Belinda Balluku.

Balluku theksoi se “qëllimi është krijimi i mburojës për abonentët familjarë dhe për bizneset e vogla, por duke u kujdesur edhe për abonenët e mëdhenj që kërkojnë të blejnë nga operatori i tregut të lirë”.

Në fillim të muaji nëntor Shqipëria do të dalë në tregun ndërkombëtar për të marrë 700 milionë euro borxh. Lajmin e konfirmoi ministrja e Financave Delina Ibrahimaj. Në të njëjtën kohë është miratuar projektvendimi i një granit prej 1.25 milionë eurosh nga qeveria gjermania, në funksion të nxitjes së punësimit.

“Projektvendimi i parë ka të bëjë me vlerën e eurobondit, që pritet që të dilet në treg në fillim të nëntorit do të ketë një vlerë 700 milionë euro. Procesi është duke u ndjekur nga Ministria e Financave dhe këshilltarët. Dalja në treg nuk është vendosur si datë me qëllim që të dalim në ditët më të përshtatshme për të marrë normën më të përshtatshme të interesit. Po ashtu u miratua një projektvendim që ka lidhje me nxitjen e punësimit, arsimin profesional dhe zhvillimin ekonomik të bizneseve të vogla. Sot miratuam një projektvendim që i hap rrugën rritjes së një granti nga qeveria gjermane, prej 1, 25 milion euro që i bashkohet grantit duke e çuar në total në  25.15 milion. Nëpërmjet këtij projekti janë trajnuar një numër i madh biznesesh”, u shpreh Ibrahimaj.

Qeveria ka miratuar krijimin e Agjencisë së Sigurisë, e cila do të nisë funksionin e saj në janar të 2022, ka në fokus jo vetëm sistemin e edukimit dhe trajnimit të profesionistëve të shëndetit, por edhe të garantojë që qytetarët të marrin shërbime.

Ministrja e Shëndetësisë Ogerta Manastirliu njoftoi se dje kanë mbërritur edhe 116 mijë vaksina Pfizer, teksa rikujtoi se më 1 nëntor nis vaksinimi me dozën e tretë për personat mbi 60 vjeç.

“Sot kemi miratuar një vendim të krijimit të Agjencisë së sigurisë, të cilësisë së shërbimeve të kujdesit shëndetësor dhe shoqëror. Është vendim që është hartuar për ngritjen e një institucioni të ri, i cili jo vetëm që nuk do të shkrijë funksionet e dy institucioneve të kujdesit shëndetësor, por do t’i shërbejë shërbimeve të kujdesit shëndetësor, pasi do të akreditojmë institucionet. Agjencia e re e cila do të nis funksionimin e saj me ekzekutim të plotë në janar të 2022 dhe do të ketë mundësi që të zgjerojë bazën e saj, me certifikimin e profesionistë vetë shëndetësisë. Kjo agjenci do të ketë mundësi që përmes platformave dixhitalizuese do kemi në dorë sistemin e trajnimeve dhe edukimin në vazhdim të profesionistëve të shëndetit. Ne sigurojmë që përmes agjencie, qytetarët shqiptarë të marrin shërbime të kujdesit shëndetësor dhe social. Në aspekt të situatës epidemiologjike, kanë mbërritur ditën e djeshme edhe 116 mijë vaksina Pfizer. Ne po vijojmë në të gjitha qendrat shëndetësore, edhe në qendrat e vaksinimit të përqendruar, që të vaksinohen qytetarët. Periudha e dimrit do të jetë një periudhë që edhe vendet e tjera janë duke u alertuar. Nga 1 nëntori do të nisim dhe vaksinimit me dozat e treta, për moshat mbi 60 vjeç”, deklaroi Manastriliu.