Trump ‘shpëton’ botën, Balla shpëtimtar i Ramës: Mazhoranca refuzon të përshëndesë marrëveshjen e paqes në Gaza

Në hapat e kryeministrit Edi Rama, i cili vetëm pak ditë më parë ironizoi Donald Trump-in për lapsusin e tij kur përmendi Shqipërinë në vend të Armenisë, duke deklaruar se “është shuar konflikti me Azerbajxhanin”, është dhe “masha” e tij, Taulant Balla.

Balla e tregoi dhe njëhërë që është besnik i Ramës, teksa në seancën e sotme ‘zvogëloi’ fuqinë e Trump.

Deputeti demokrat Tritan Shehu, e quajti ditë historike për botën nënshkrimin e marrëveshjes së paqes së planit Trump  mes Izraelit dhe Hamasit.

“ Do tju bëj një propozim procedural për tju shkundur nga heshtja që ju ka mbërthyer juve si mazhorancë dhe qeveri. Sot është një ditë historike për gjithë botën. Sot u nënshkrua marrëveshja e paqes e planit Trump. Kjo nuk mund të kalojë në heshtje në parlamentin shqiptar.

 Sot shënohet një fazë e re paqeje dhe stabiliteti nga paqebërësi Trump. Sot është një ditë që duhet të shkundë këtë parlament dhe këtë mazhorancë për heshtjen disa javore që ka pasur ndaj planit Trump, ndaj mos mbështetjes që ju dha nga kjo mazhorance.”

Por menjëherë pas fjalës së tij, reagoi kreu i Grupit Parlamentar të PS, Taulant Balla, duke i dhënë një përgjigje plot ironi që rikujtoi tonin thumbues të vetë kryeministrit Rama ndaj ish-presidentit amerikan.

“Na i kurseni shfaqet butakorike mes garës së kush është më pro amerikani apo kandidati për ministër të jashtëm mes jush.

Njeriu që ka meritën kryesore në këtë çështje, Trump, ende nuk ka udhëtuar në Lindjen e Mesme. Mos ia marrim meritën, sepse siç tha PD, kreu i grupit, ne duhet të jemi parlamenti i parë në botë që vetëm Trump pritet ta firmosë javën e ardhshme.

Është një marrëveshje që ende nuk është ratifikuar. Ky ndonjë ditë do të na shpallë luftë me marsin. Sapo mbaruam Konferencën e Kryetarëve, jemi anëtarë të NATO-s, të kursejmë vetes diskutime ku dukemi qesharake. Mbështesim përpjekjet e Trump”, tha ai.

Izraeli dhe Hamasi janë dakordësuar dhe kanë nënshkruar për fazën e parë të planit të paqes në Rripin e Gazës. Donald Trump, i cili bëri njoftimin përmes një postimi në Truth Social, thekson se shumë shpejt do të dorëzohen pengjet izraelite dhe se IDF do të tërheqë të gjithë trupat në një vijë të rënë dakord.

“Jam shumë krenar të njoftoj se Izraeli dhe Hamasi kanë nënshkruar Fazën e parë të Planit tonë të Paqes. Kjo do të thotë që TË GJITHË pengjet do të lirohen shumë shpejt dhe Izraeli do të tërheqë trupat e tij në një vijë të rënë dakord, si hapat e parë drejt një Paqeje të Fortë, të Qëndrueshme dhe të Përjetshme. Të gjitha palët do të trajtohen në mënyrë të drejtë!

Kjo është një DITË E MADHE për Botën Arabe dhe Muslimane, Izraelin, të gjitha kombet përreth dhe Shtetet e Bashkuara të Amerikës, dhe ne falënderojmë ndërmjetësit nga Katari, Egjipti dhe Turqia, të cilët punuan me ne për ta bërë të mundur këtë Ngjarje Historike dhe të Pashembullt. TË BEKUAR QOFSHIN PAQËBËRËSIT!”, ka shkruar Trump.

IDF do të tërhiqet nga pjesa më e madhe e Rripit të Gazës (duke mbetur vetëm në Rafah) brenda 24 orëve të ardhshme. Sipas Hamasit, në këmbim të pengjeve, do të lirohen 2 mijë të burgosur palestinezë që mbahen në Izrael dhe shkëmbimi do të bëhet brenda 72 orëve nga zbatimi i marrëveshjes së arritur.