PS hap sot zarfet për Presidentin, kush janë dy emrat ‘e preferuar’ të Ramës?

Partia Socialiste do të mbledhë sot në orën 17:00 Kryesinë. Socialistët do të hapin sto zarfet me emrat e propozuar si kandidatë për Presidentin e ri.

Ndërsa të shtunën, do të zhvillohet seanca për votimin e Presidentit që do të përcaktohet nga PS dhe pritet për t’u parë nëse PD do t’i japë votat kandidatit të maxhorancës apo jo. Procesi i negociatave mes Enkelejd Alibeajt dhe socialistëve nuk dha rezultat.

Demokrati doli i zhgënjyer nga pakti me Ballën, kur ky i fundit i kërkoi që kandidaturat e tij të vinin të vulosua me firmat e 20 deputetëve, gjë për të cilën Alibeaj pretendoi të ishte shkelje e marrëveshjes mes tij dhe grupin negociator të PS.

Në vorbullën e shumë diskutimeve, ka pasur mjaft emra të përfolur si kandidatë të denjë nga ana e PS për President. Dy prej tyre janë lakuar më së shumti, teksa edhe vetë socialistët nuk i kanë përjashtuar nga mundësia e përzgjedhjes së të paktën njërin nga dy më të përfolurit.

Ardian Dvorani dhe Majlinda Bregu janë përfolur gjerësisht si dy kandidaturat e preferuara të qeverisë Rama.

Dvorani, anëtar i Gjykatës së Lartë, nëse zgjidhet do të jetë Presidenti i parë i vendit që jen nga ‘bota e ligjit’. Edhe vetë kreu i grupit parlamentar të PS, Taulant Balla, është shprehur se nëse Dvorani propozohet për President, ai do ta votonte.

Dvorani u shpall vitin e kaluar nga DASH si “Kampion i antikorrupsionit”, çka mund të shërbejë edhe si një bonus për të.

Nga ana tjetër, është edhe ish-ministrja e Berishës dhe ish-drejtuesja e Këshillit të Bashkëpunimit Rajonal, Majlinda Bregu, e cila flitet të jetë dhe më e preferuara e Ramës.

Sekretari i Përgjithshëm, Bledi Klosi, tha dje në një intervistë për Newës 24  se si Dvorani edhe Bregu i plotoosjnë kushtet duke marrë parasysh kurrikulat e tyre. Kjo nuk e përjashton mundësinë që të dy të jenë kandidatët më të favorizuar nga maxhoranca.

Megjithatë ka pasur edhe emra të tjerë që janë përfolur. Mes tyre është anëtari i Gjykatës Kushtetuese Përparim Kalo, ambasadori i Shqipërisë në OKB Ferit Hoxha, deputetja socialiste Mimi Kidheli, diplomati Zef Mazi apo edhe ish-kryeministri Fatos Nano.