Spiropali vs Balluku: rivaliteti i heshtur që po rishkruan ekuilibrat në PS

Një detaj i rrjeteve sociale ka tërhequr vëmendje mes kësaj “gjullurdie” politike: sipas vëzhgimeve, Belinda Balluku figuron se ndjek një numër të gjerë ministrash dhe ish-zyrtarësh të kabinetit, përfshirë emra si Ulsi Manja, Bledi Çuçi, Ogerta Manastirliu dhe të tjerë ndërsa nuk ndjek në Instagram ish-ministren e Jashtme, Elisa Spiropali.

Mirëpo ndryshe nga Balluku, Spiropali e ka follow socialisten.

VOZITJE NE KOHE

Ditëve të fundit janë rikthyer në vëmendje edhe pretendime për rivalitet të hershëm mes tyre, si në aspektin politik ashtu edhe në organizimin e brendshëm të fushatave.

Sipas disa raportimeve mediatike, është përmendur se shkarkimi i Spiropalit nga posti i ministres së Jashtme është paraqitur si një vendim i ndikuar nga balancat e brendshme dhe raportet e saj me Ballukun.

Po ashtu, në një zhvillim parlamentar, Spiropali është pyetur nga deputeti Agron Shehaj se përse Balluku nuk jep dorëheqjen nga detyra pasi është marrë e pandehur për korrupsion, por vijon shfaqjen krah për krah me Edi Ramën.

Spiropali është shprehur se “në Shqipëri nuk ka të paprekshëm” dhe se secili mban përgjegjësi para ligjit dhe qytetarëve.

“Në Shqipëri nuk ka të paprekshëm. Secili mban përgjegjësi para ligjit, të gjithë, secili mban përgjegjësi para fytyrës se vet dhe para elektoratit të vetë”, tha Spiropali.

Në disa raportime është përmendur gjithashtu se në organizimet politike në Tiranë dhe në ndarjen e roleve elektorale, Spiropali është lënë jashtë disa angazhimeve, gjë që është interpretuar si shenjë e ndryshimeve të ekuilibrave të brendshëm në mazhorancë.

Më 3 tetor 2025 Rama teksa ndau detyrat dhe rolet për fushatën e Tiranës, Spiropalin e përjashtoi nga kjo fushatë.

Rama vijoi ironinë me ish-Ministren e Jashtme kur tha që ajo do të “ qëndrojë nëpër botë”.

BRAKTISJA E SPIROPALIT DHE SULMET NGA "MIQTE"

Theksojmë që në dukje duket se Spiropali është “braktisur” nga shumica e kampit socialist. Ministrja e Arsimit dhe Sportit Mirela Kumbaro u pyet lidhur me deklaratat e Spiropalit, e cila u shpreh se “Europa mbetet vetëm një retorikë për mazhorancën socialiste”.

Pas mbledhjes së qeverisë, Kumbaro tha se i përket brezit që ishte me sloganin “E dua Shqipërinë si gjithë Europa” dhe është rritur me këtë slogan.

Ajo nuk i ka kursyer thumbat për Spiropalin teksa është shprehur se, PS është pranë realizimi të këtij slogani dhe se mazhoranca përgjigjet vetëm me punë.

“Ju më pyesni që të jap opinioni për opinionet, ndërsa unë këtu jam sot që të jap opinion për punën. Unë i përkas brezit me sloganin “E dua Shqipërinë si gjithë Europa”, dhe unë tani kam përgjegjësinë që të jem pranë brezit që është shumë afër kësaj dhe kanë përgjegjësinë politike për Shqipërinë në Europë.

Kjo matet me punë që Shqipëria ka bërë në këto 35 vite tranzicion. Sot jemi në kohën kur kjo matet me centimetra, matet me punë dhe dokumentacion dhe unë sapo iu dhashë provën që një nga këto, janë edhe VKM-të e miratuara”, tha Kumbaro.

Edhe Kryeministri Edi Rama ka pranuar hapur dështimin e Ministrisë së Jashtme, duke e krahasuar atë me RTSH-në dhe duke e cilësuar një strukturë të pareformuar dhe jashtë realitetit.

Rama u shpreh se edhe përpjekjet ligjore të ndërmarra deri më sot kanë qenë thjesht “makijazh”, pa sjellë ndryshimin e nevojshëm, ndërsa diplomacia shqiptare, sipas tij, nuk i përgjigjet sfidave të kohës, as rolit gjithnjë e më të rëndësishëm të diasporës.

"Sa i përket ligjit për diplomacinë publike. Ministria e Jashtme është si Televizioni Publik Shqiptar. Është një tjetër dështim i madh i yni. E kam thënë dhe po e them. Nuk është një institucion në funksion të këtyre sfidave sepse nuk është reformuar asnjëherë.

Edhe një ligj që e bëmë nuk ishte ligj apo reformë, ishte tualet. Makijazh! Ligji duhet të hapë rrugën për reformë, për të futur ajrin e pastër. Shqipëria ka sot njerëz plot jashtë në diasporë.

Diaspora është pjesë e elektoratit të rëndësishme. Gradat janë marrë peng nga spikerat e politikës së jashtme të televizionit, as televizion nuk është se ata as nuk dalin. Sa herë shkoj në atë ministri, më duket sikur atje është vetëm ministri, sekretarja dhe roja”, tha Rama.

Po ashtu  kreu i i grupit parlamentar të PS, Taulant Balla, deklaroi se do mbledhte grupin për të sanksionuar Elisa Spiropalin, për mungesën e saj në seancën e 12 marsit ku u votua imuniteti i Ballukt.

Deklarata e Ballës nuk ka kaluar pa një kundërpërgjigje nga Spiropali, e cila ka reaguar publikisht me një postim në Facebook. Ish-ministrja e Jashtme i kërkon Ballës të thërrasë mbledhjen e grupit pa vonesë, duke u kujdesur që diskutimi të jetë i hapur.

“Taulant, e lexova me vonesë një deklaratë tënden publike. Jam plotësisht dakord. Nëse çështja kërkon konsultim me grupin parlamentar, atëherë është pikërisht ajo që duhet bërë pa vonesë.

Thirre grupin dhe zhvillojmë një diskutim të plotë. Vendimmarrja kolektive është forca e grupit të PS dhe garancia e legjitimitetit politik. Çdo qëndrim që del nga një diskutim i hapur, i troçtë dhe i ndërgjegjshëm, meriton respekt, pavarësisht drejtimit që merr.

Rëndësi ka që vendimi të jetë i menduar, i argumentuar dhe në përputhje me përgjegjësinë që kemi përballë publikut”, shkruan Spiropali.

PERFUNDIMI

Nëse lexohen të gjitha zhvillimet dhe sinjalet politike të ditëve të fundit, përplasja e perceptuar mes Spiropalit dhe Ballukut po shihet gjithnjë e më shumë si një rivalitet i heshtur që mund të ndikojë në rishkrimin e ekuilibrave të brendshëm në Partinë Socialiste.

Çështjet e votimeve, reagimet publike dhe ripozicionimet brenda grupit parlamentar po ushqejnë idenë se brenda mazhorancës po konsolidohen dy linja të ndryshme ndikimi.

Në këtë dinamikë, Spiropali duket se po del më e ekspozuar politikisht, duke u vendosur shpesh në qendër të debatit dhe kritikave, ndërsa Balluku perceptohet si një figurë me peshë më të konsoliduar në strukturat ekzekutive dhe në raportin me Kryeministrin. / POLITIKO.AL/ N. Fero