Agron Shehaj sfidon Lulzim Bashën, kandidon për kryetar të Partisë Demokratike: Duhet vizion dhe drejtim i ri

Kandidati fitues për deputet i PD, Agron Shehaj ka shpallur kandidaturën për kryetar të Partisë Demokratike.

Lajmin e ka bërë të ditur përmes një postimi në rrjetet sociale, ku shkruan se Shqipëria ka sot nevojë për opozitë të fortë me vizion dhe drejtim të ri.

Shehaj thekson se konkurrimin nuk e sheh si garë për post, por si një përpjekje të përbashkët me të gjithë demokratët që dëshirojnë që PD të jetë partia e anëtarëve: një parti e vërtetë demokratike, moderne dhe e hapur.

Postimi i plotë:

Shqipëria ka sot nevojë për opozitë të fortë, parimore dhe frymëzuese. Shqipëria ka sot nevojë për Partinë Demokratike!

Ne demokratët do ta kapërcejmë gjendjen e vështirë ku jemi dhe do ngrihemi më të fortë se më parë. Përballë autokracisë, korrupsionit dhe paaftësisë së qeverisë, ne do të ndërtojmë alternativën e lirisë, ndershmërisë dhe aftësisë.

Për këtë duhen energji të reja, vizion i ri, drejtim i ri.

Me ketë bindje, kam vendosur të kandidoj për kryetar të Partisë sime. Konkurimin nuk e shoh si garë për një post, por si një përpjekje të përbashkët me të gjithë demokratët që dëshirojnë që partia jonë të jetë partia e anëtarëve: një parti e vërtetë demokratike, moderne dhe e hapur.

Unë besoj se çdo njeri duhet të luftojë duke dalë në shesh për atë që beson. Unë besoj se shërimi nga humbja vjen nga veprimi dhe jo nga apatia e ankimit për padrejtësitë, që sigurisht kanë ndodhur. Unë besoj se përparimi vjen përmes ndryshimit dhe jo ripërsëritjes së të njëjtave gabime.

Dua të shpreh mirënjohjen për të gjithë ju që më keni besuar e nxitur të marr përgjegjësinë e garës. Unë kam hyrë në politikë për të punuar për njerëzit, jo për t’u pasuruar dhe nuk do ju zhgënjej.

Kujtojmë se deri tani kanë dorëzuar formularin e kandidimit Fatbardh Kadilli, Ibsen Elezi, Edith Harxhi dhe Lulzim Basha, ndërsa ish nënkryetari i FRPD, Lisandër Hoxha njoftoi sot tërheqjen nga gara.