Berisha: Gerond Meçe u mor peng pasi përmendi emrin e Linda Ramës dhe Armand Frangut

Kryetari i Partisë Demokratike, Sali Berisha, ka bërë akuza të rënda lidhur me atë që e cilësoi si skandal mafioz në Agjencinë Kombëtare të Shoqërisë së Informacionit (AKSHI), duke përfshirë emra të lidhur me familjen e kryeministrit Edi Rama.

Berisha deklaroi se, ndryshe nga periudha 2005–2013, kur sipas tij janë lidhur vetëm 18 kontrata sekrete dhe ekskluzivisht për Shërbimin Informativ të Shtetit dhe Prokurorinë e Përgjithshme, sot janë zhvilluar rreth 250 tendera dhe kontrata sekrete, në kundërshtim flagrant me ligjin.

Sipas tij, një nga figurat kyçe në këtë skemë është Ermal Beqiri, të cilin Berisha e cilësoi si personin që, sipas akuzave, është dërguar për të zbrazur dhe eksportuar të dhënat e sistemit TIMS dhe që ka rol qendror në vjedhjet e kryera në AKSHI dhe institucione të tjera shtetërore.

Berisha u ndal edhe te rasti i biznesmenit Gerond Meçe, për të cilin deklaroi se është marrë peng pasi ka deklaruar nën regjistrim ambiental se Linda Rama dhe Armand Frangu diktonin të gjithë tenderat në AKSHI.

Ai shtoi se, sipas informacioneve, pengmarrja është organizuar nga Ergys Agasi, i cilësuar si njeri i afërt i familjes Rama, në bashkëpunim me një drejtues të Policisë së Tiranës.

Berisha pretendoi se Meçe ka arritur të filmojë momentin e pengmarrjes dhe se kjo provë i është paraqitur autoriteteve gjermane, çka i ka mundësuar largimin dhe mbrojtjen e tij.

PJESE NGA DEKLARATA

Në qoftë se në vitet 2005-2013 ka pasur vetëm 18 kontrata sekrete dhe ato ekskluzive për shërbimin informativ kombëtar dhe prokurorinë e përgjithshme, dhe për asnjë institucion tjetër, kjo që shihni ju, ka zhvilluar 250 tendera sekretë dhe kontrata sekrete, në kundërshtim flagrant me çdo ligj, përveç ligjit që duhet të vjedhë familja Rama.

Ligji që tenderat duhet t’i marrë familja Rama.

A mund të imagjinoni që kjo mafioze e paimagjinueshme, 96 përqind të të gjitha shumave të prokuruara, t’ia japë dy kompanive.

Prisni, se ka zhvillim tjetër.

Ky është Ermal Beqiri, famoz.

Ky është personi që e dërgoi Edi Rama për të zbrazur komplet dhe eksportuar të dhënat e TIMS-it.

Ky person është strumbullar kryesor në të gjitha vjedhjet që janë bërë në AKSHI dhe një seri institucionesh të tjera.

Ky është Gerond Meçe.

Çfarë i ndodhi këtij?

Këtë e morën peng.

U prishën pazaret pasi ky deklaroi nën regjistrim ambiental se Armand Frangu dhe Linda Rama diktonin të gjithë tenderat në Agjencinë Kombëtare të Shoqërisë së Informacionit.

Gerond Meçe, pas pengut, është arratisur, më thonë në Gjermani, ku ka rrëfyer të gjithë historitë mafioze të AKSHI-t apo agjencisë së familjes Rama, të cilat nuk kanë të përshkruar.

Për Gerondin organizoi marrjen peng njeriu më i afërt i familjes Rama, Ergys Agasi bashkë me një drejtor të policisë së Tiranës.

E çuan për kompetencë tek Suel Çela, e çuan për kompetencë atje.

Ky kishte arritur të filmojë pengmarrjen e tij, u arratis menjëherë dhe ka marrë azil, ose është në mbrojtje, thuhet në Gjermani, pasi ka paraqitur videon e pengmarrjes nga koordinatori i mafies, Ergys Agasi, këshilltari kryesor i kryeministrit Rama për mafien.

 

ZYRA E MEDIAS DHE KOMUNIKIMIT, PARTIA DEMOKRATIKE