Berisha: Heqja e imunitetit të Ballukut dhe dërgimi i Linda Ramës para Skapit i hapin rrugën integrimit

Kreu i Partisë Demokratike, Sali Berisha, ka mbajtur një fjalim të ashpër nga foltorja e Kuvendit, ku ka akuzuar mazhorancën se po e devijon axhendën parlamentare nga problemet reale të qytetarëve.

Berisha deklaroi se dy çështjet më jetike për shqiptarët janë çmimi i naftës dhe procesi i integrimit europian, duke theksuar se të dyja, sipas tij, janë keqmenaxhuar nga qeveria e kryeministrit Edi Rama.

“Të dashur qytetarë dhe qytetare, Edi Rama me vasalët e tij në këtë parlament bëjnë gjithçka që ta nxjerrin parlamentin jashtë kohë, që t’i imponojë parlamentit një axhendë e cila nuk ka asgjë të përbashkët me interesat tuaja.

Sot, dy janë çështjet më themelore që u interesojnë qytetarëve shqiptarë, nafta dhe integrimi europian.

Integrimin evropian ju e mbyllët, dërgoni poshtë e përpjetë të deleguar të diskredituar, të cilët jo që nuk u zgjidhin ju punë, por përkundrazi neverisin të gjithë ata që i takojnë.

E bazoni në telefonata hektike të një njeriu që uroj që të mos i marrë më në telefon, që i kap dhe nuk i lëshon në telefon. Por ky nuk është procesi i integrimit.”

Ai akuzoi qeverinë se ka bllokuar rrugën drejt Bashkimit Europian, ndërsa pretendoi se procesi i integrimit nuk mund të ecë përpara pa luftë reale kundër korrupsionit. Në këtë kuadër, Berisha kërkoi heqjen e imunitetit për zëvendëskryeministren Belinda Balluku dhe dërgimin e saj për hetim në SPAK.

Gjithashtu, ai bëri thirrje që edhe Linda Rama të paraqitet para drejtësisë, duke e akuzuar si të përfshirë në çështje që, sipas tij, lidhen me korrupsionin dhe menaxhimin e fondeve publike.

“Procesi i integrimit është për momentin heqja menjëherë e imunitetit të Lubi Ballukut dhe dërgimi i saj atje ku kërkon Spaku.

Është paraqitja para Skapit e Linda Ramës, arkitektes së vërtetë të kopshtit privat të Edi Ramës.

Ju mund të gjeni prokurorë që fsheh dokumentet dhe e përjashton Lindën, po, por problemi është se dosja është në të gjithë Europën.

Dosja e AKSHI-t dhe e Lubisë janë dosje evropiane dhe botërore.

Ju mund të hiqni kë të doni dhe të vini kë të doni, por dosjet janë aty.

Ju e morët vesh çfarë deklaroi komisionerja dje.”

Në fjalën e tij, Berisha u ndal edhe te çmimi i lartë i karburanteve në vend, duke e krahasuar me vendet fqinje dhe duke e cilësuar si një barrë të padrejtë për qytetarët shqiptarë, veçanërisht për fermerët.

Ai paralajmëroi gjithashtu se, sipas tij, kryeministri Rama mund të përballet me padi në të ardhmen, duke e akuzuar për mashtrim publik.

“Përgëzoi Malin e Zi që filloi hartimin e traktatit dhe vazhdoi me një frazë pa cituar Shqipërinë, lufta kundër korrupsionit dhe shteti ligjor, vetëkuptohej Shqipëria, mbetet në themelet e këtij procesi.

Ndaj dhe nuk ke ndërmend, por të paktën ne u themi shqiptarëve se parlamenti është jashtë problematikës tuaj.

Po nafta? 150 lekë shitet në Maqedoni sepse Maqedonia mori masa të tjera pas rritjes së çmimit.

Dhe kjo shitet për të gjithë qytetarët. Për fermerët shitet shumë më lirë.

E keni shndërruar në një ndëshkim për shqiptarët.

A mundet parlamenti të kapërcejë këtë çështje?

Mos harroni një gjë se qëndrimet që mbajnë dhe u bëjnë fajtorë, jeni krim në vazhdim, jeni krim në bashkëpunim.

Po, po, u garantoj unë ju.

Nesër Edi Rama paditet si mashtrues publik!”