Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Berisha për Ramën në Bruksel: Përqesh protokollet dhe shkon me benevreke, bëri avokatinë e Serbisë

Politiko 24 Qershor 2022, 11:35

Berisha për Ramën në Bruksel: Përqesh protokollet dhe shkon

Kryetari i PD-së, Sali Berisha foli për dështimin e radhës së Shqipërisë për nisjen e bisedimeve me BE-në dhe sjelljen e kryeministrit Edi Rama në Bruksel.

Kryedemokrati u shpreh se Rama shkoi atje jo si kryeministër i Shqipërisë, por si “vasal” i Serbisë. Berisha theksoi se refuzimi dhe më pas pranimi për të shkuar në Samit, lidhet me urdhrat që Rama merrte nga Beogradi.

Ai nënvizoi se Rama “përqesh” protokollet zyrtare, ndërsa dënoi deklaratat e tij, që sipas Berishës, nuk fokusoheshin te Shqipëria, por te mbrojtja e Serbisë.

“Një shkak tjetër po kaq madhor i refuzimit nga Bashkimi Europian të hapjes së negociatave me Shqipërinë dhe mosveçimit të saj nga Maqedonia lidhet me faktin e paprecedentë në historinë e Brukselit. Në qoftë se ju lexoni të gjitha deklaratat para dhe gjatë Samitit të Edi Ramës, ato faktojnë katërcipërisht se ky zotëri shkoi në Bruksel jo si përfaqëues i Shqipërisë, por si vasal i Aleksandër Vuçiç dhe u soll atje sikur të ishte Dodik, president i republikës serbe të Bosnjes dhe jo kryeministër i Shqipërisë.

Vetëm dy-tre orë pasi padroni i tij në Beograd njoftoi se për të marrë vendim do të mbledh qeverinë për të shkuar në Bruksel, vasali i tij njoftoi se nuk do marr pjesë në samit dhe iku në udhëtim privat në Paris.

Sapo padroni i tij ndryshoi qëndrim dhe ky qëndrim nuk kishte të bënte me veton bullgare se Serbia i ka hapur negociatat, vasali ndryshoi qëndrim dhe shkoi në Bruksel. Atje faktoi se ishte përfaqësues i aleancës trilaterale të serbomadhit Vuçiç. Me deklaratat e tij Rama dëshmoi qartë se është i rreshtuar jo me Ballkanin e Berlinit apo Brukselit, por me Ballkanin e Beogradit dhe Putinit. Në emër të këtij rreshtimi u shfaq në konferencë shtypi me trojkën famëzezë, padron Vuçiç dhe vasalët Rama dhe Kovaçevski. Asgjë nuk mund të lidhte kryeministrin e Shqipërisë një konferencë shtypi të përbashkët me presidentin e Serbisë.

Në konferencë shtypi ishte vetëm Trojka e aleancës trilaterale Beograd- Tiranë- Shkup. Në atë konferencë nuk u shfaqën as Vjosa Osmani, Gjukanoviç dhe përfaqësuesi i Bosnjes. Në daljen në konferencë në këtë format, Rama faktoi se në cilën anë është i rreshtuar. Mos harroni se ky samit ishte historic, sepse BE në kushte që ndonjëherë nuk mund të imagjinoheshin u ofroi për qëllime politike statusin kandidat dy vendeve, Ukrainës dhe Moldavisë.

Ai shkon në samite me benevreke për të përqeshur protokollet zyrtare që bazohen në respekt të mikut që të pret. Tani ka nxjerrë krye si një njeri që i kundërvihet projektit europian në Ballkan. Skandaloze ishin deklaratat e Ramës. A dëgjuat ta përmendte ndonjëherë Shqipërinë? Fare. U mor vetëm me avokatinë e Serbisë dhe qortonte liderët e BE-së pse i kërkoi Serbisë të zbatonte sanksionet kundër Rusisë”, tha Berisha.