Berisha: Protesta shënoi nisjen e misionit për shpëtimin e Shqipërisë

Kryetari i Partisë Demokratike, Sali Berisha, deklaroi se protesta e zhvilluar një ditë më parë në bulevardin “Dëshmorët e Kombit” shënoi inaugurimin e misionit të ri të opozitës për, sipas tij, “shpëtimin e demokracisë, familjes shqiptare dhe Shqipërisë”.

Në konferencën për media në selinë e PD-së, Berisha falënderoi qytetarët për pjesëmarrjen masive, disiplinën dhe përmbajtjen e zemërimit, duke e cilësuar tubimin si protestën më të fuqishme paqësore të mbajtur ndonjëherë.

Ai tha se mesazhi i protestës ndaj Kryeministrit Edi Rama ishte i qartë: “Largohuni”.

Berisha theksoi se zemërimi dhe urrejtja ndaj qeverisë janë ndjenja të përhapura te qytetarët, duke hedhur poshtë, sipas tij, propagandën se opozita nuk gëzon mbështetje popullore.

 Ai e përshkroi përballjen politike aktuale si një betejë “për jetë a vdekje të demokracisë”, nën moton “ja të vdesim, ja të rrojmë për liri”.

Kreu i PD-së akuzoi Kryeministrin Rama se po blen kohë dhe se nuk do të lejojë heqjen e imunitetit të Belinda Ballukut, pasi sipas tij është vetë i përfshirë në aferat e denoncuara. Berisha paralajmëroi se çdo përpjekje për të shmangur drejtësinë do të përbënte, sipas tij, rrezik për demokracinë dhe opozitën.

Fjala e Sali Berishës

Mirëdita.

Së pari, dëshiroj të shpreh mirënjohjen më të thellë, nderimin më të madh për të gjithë ata qytetarë dhe qytetare, të rinj, të moshuar të Tiranës dhe mbarë Shqipërisë që mbushën dje bulevardin ‘Dëshmorët e Kombit’ në protestën më të fuqishmte paqësore që mbahet mend ndonjëherë.

Që inauguruan dje me praninë e tyre misionin e ri të opozitës shqiptare, shpëtimin e demokracisë, shpëtimin e familjes shqiptare, shpëtimin e Shqipërisë.

Secili pjesëmarrës firmosi dje kontratën me demokracinë, me familjen dhe me Shqipërinë për t’u dalë zot gjer në fitoren e plotë dhe përfundimtare mbi këtë regjim.

Duhet t’i falënderoj për përmbajtjen e zemërimit dhe urrejtjes së tyre të pakufishme që kanë ndaj kësaj narkoqeverie.

Unë e kuptoj që ai ishte një mundim i veccantë, por kjo është një betejë në vazhdim.

Ky ishte një inaugurim me një rëndësi të jashtëzakonshme dhe mesazhin më të fuqishëm për Edi Ramën, narkoqeverinë e tij, ky mesazh përmblidhe me një fjalë të vetme: largohuni!

Largohuni!

Nuk mund të ketë fjalë që mund të shprehë ata që ndjej për ata qytetarë që erdhën, për atë disiplinë që treguan, për atë përkushtim që treguan.

Kjo është betejë ‘ja të vdesim, ja të rrojmë për liri’! Rama nuk do ia heqë imunitetin Lubisë sepse është vetë prapa

Por nga ana tjetër, jashtë të gjitha përpjekjeve të makinës toksike propagandistike të Edi Ramës, vuvuzelave të tij se populli nuk ngrihet, se populli nuk ka besim tek opozita, se kështu dhe ashtu, madje sa nuk thonin se populli e do Eid Ramën, kishte edhe ndonjë që e thoshte këtë, ata faktuan se cilat janë ndjenjat e popullit për Edi Ramën, urrejtja e pakufishme, zemërimi i pakufishëm.

Me këto dy terma mund të përmblidhen ndjenjat e qytetarëve.

Siç kemi deklaruar edhe më parë, kjo betejë është një betejë për liri ose vdekje, për jetë ose vdekje, nën moton, ja të vdesim, ja të rrojmë për liri.

Çdo qytetar i ndershëm i këtij vendi, çdo opozitar i këtij vendi, çdo socialist i ndershëm i këtij vendi, duhet ta ketë të qartë, dhe e ka të qartë se me zhvillimet dhe zbulimet e fundit, faktimin, se unë për shembull Ergys Agasin jo vetëm në këtë sallë, por edhe në aulat më prestigjioze të Europës, në Këshillin e Europës, në Parlamentin Europian, në PPE, në rezolutat tona, e kemi damkosuar si koordinatorin e Edi Ramës për veprat më të zeza.

Dhe tani po faktohen.

Pra, çdo shqiptar duhet ta ketë të qartë se kemi të bëjmë me një përballje për jetë ose vdekje të demokracisë shqiptare.

Edi Rama nuk do t’i heqë imunitetin Lubi Ballukut sepse është vetë prapa të gjitha akteve që ka kryer Lubia.

Edi Rama po blen kohë.

Pse po blen kohë?

Për vepra të zeza.

Është i gatshëm dhe i aftë të ndryshojë çdo ligj dhe rregullore, në mënyrë që të nxjerrë gjithçka jashtë përgjegjësisë ligjore dhe kjo do shënonte vdekjen e opozitës dhe opozitarizmit.

Kjo do shënonte asgjësimin politik të saj.

Ndaj dhe kjo betejë është ja të vdesim, ja të rrojmë për liri.

Dhe i garantoj shqiptarët se sa herë që opozita i është përmbajtur këtij himni solemn që ka frymëzuar shqiptarët në të gjitha kohërat, ajo ka fituar.

Ky ishte himni i viteve ’90.

Por ky ishte edhe i vitit 1998.

Me këtë himn u ngritëm ne se donin të na shfarosnin, dhe fituam.

Dhe kësaj here ne do fitojmë.

Por duhet që çdo opozitar t’i përsërisë vetes me dhjetëra herë këtë moto.

Nuk ka moto më të rëndësishme se kjo.

Opozita nuk mund të shuhet.

Shuarja e opozitës është shuarja e sovranitetit kombëtar të brendshëm.

Është fundi.

Nuk mundet kurrë një bandë kriminale, e implikuar në aktet më të rënda, në pengmarrje, në zhdukje, në çfarë aktesh, të kontrolle të pamëshira të çdo të dhëne të qytetarëve shqiptare, në kontrolle të pamëshira të transaksioneve, nuk mundet kurrë ajo të asgjësojë sovranitetin e brendshëm të një kombi, të asgjësojë opozitën.