Dokumentet/ Korrupsion në familjen presidenciale?Djali i Begajt merr 30 mijë euro nga kompania me të cilën Presidenca ka kontratë

Kryetari i Grupit Parlamentar të PD-së, Gazment Bardhi, ka publikuar dokumente që, sipas tij, faktojnë përfitime të paligjshme të familjarëve të Presidentit Bajram Begaj.

 Në një reagim nw Facebook, Bardhi akuzon kreun e shtetit për korrupsion dhe konflikt interesi, duke kërkuar zyrtarisht shkarkimin e tij.

 “Si gjithmonë, Bajram Begaj foli, por nuk tha asgjë! Çfarë e pengoi Presidentin të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit? Sado që të shmanget e të përdridhet Presidenti i çnderuar, përgjigja është vetëm një: korrupsioni dhe përfitimi i paligjshëm i Presidentit”, – shkruan Bardhi.

Sipas dokumenteve të publikuara nga opozita, djali i Presidentit Begaj jeton në Gjermani, ku punon si mjek dhe paguhet nga një spital gjerman.

 Por vetëm gjashtë muaj pas emërimit të të atit në krye të shtetit, ai ka nisur të marrë pagesa edhe në Shqipëri — konkretisht nga kompania e sigurimeve me të cilën Presidenca ka kontratë aktive për shërbime prokurimi. Vlera e pagesës? Rreth 30 mijë euro në vit.

Bardhi thekson se ky është vetëm një nga rastet skandaloze për të cilat opozita ka kërkuar shkarkimin e Presidentit Bajram Begaj, duke paralajmëruar se “ka edhe të tjera raste që do të publikohen së shpejti”.

Postimi i plote

Si gjithmonë, Bajram Begaj foli, por nuk tha asgjë!

Çfarë e pengoi Presidentin të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit? Sado që të shmanget e të përdridhet Presidenti i çnderuar, përgjigja është vetëm një: Korrupsioni dhe përfitimi i paligjshëm i Presidentit!

Fotot më poshtë janë marrë nga dokumente zyrtare të deklarimit të pasurive dhe nga Thesari i Shtetit. Një shpjegim i shkurtër i tyre: I biri i Presidentit jeton në Gjermani, ku paguhet nga një spital si mjek. Por, 6 muaj pas emërimit të babait president, paguhet edhe në Shqipëri nga kompania e sigurimeve, me të cilën ka kontratë prokurimi presidenca. Pagesa është 30 mijë euro në vit.

Ky është vetëm një nga rastet skandaloze për të cilat kemi kërkuar shkarkimin e Presidentit të çnderuar Bajram Begaj. Ka edhe të tjera. Prandaj, Kuvendi nuk mund të mbyllë sytë përpara korrupsionit, që nis nga maja e shtetit