Këlliçi reagon për monitorimin e komenteve online: Rama po tenton të kontrollojë zërat kritikë

Deputeti i Partisë Demokratike, Belind Këlliçi, ka reaguar ndaj deklaratave për monitorimin e hapësirës online nga Policia e Shtetit, duke akuzuar qeverinë se po ndërmerr masa ndaj qytetarëve që shprehin kritika në internet.

Në një postim në rrjetet sociale, Këlliçi tha se kontrolli i komenteve online është një përpjekje e mazhorancës për të kufizuar zërat kundër qeverisë. Sipas tij, interneti është një nga hapësirat ku pushteti nuk ka kontroll të plotë.

Deputeti demokrat deklaroi se qeveria ka shtuar, sipas tij, survejimin dhe presionin ndaj protestuesve dhe kritikëve, duke e cilësuar si shqetësuese përfshirjen e Policisë së Shtetit në këtë proces.

Postimi i plotë:

Edi Ramës i ka ngelur vetëm të mbyllë internetin!!!

Edi Rama po merr çdo masë që një sundues mundet në një vend europian, në proces integrimi.

Ai ka shtuar survejimin, mbikqyrjen, represionin, dhunën ndaj protestuesve e zërave kritikë, tani zyrtarisht u pohua dje se Policia e Shtetit do të merret me ata që bëjnë komente të papëlqyeshme në internet.

Kjo është hapësira që nuk e kontrollon dot me blerje e me kamzhik.

Deklarimi i Drejtorit të Policisë është shqetësues.

I keqpërdorur nga Edi Rama ai tenton të frikësojë sidomos të rinjtë që kanë prishur rëndë rehatinë e bosit të madh.

Edi Ramës i ka ngelur tanimë një masë in-extremis pa marrë ende. Të bllokojë internetin e ta lërë Shqipërinë të izoluar.

Për karrigen e tij e për frikën që ka nga drejtësia kur të mos ketë më pushtet, është gati të bëjë çdo gjë.