Kuvendi “harron” të shkarkojë Ballukun, figuron në dokumente si ministre; Balliu: Ka akoma fuqi ekzekutive zonja?

Deputeti demokrat Klevis Balliu, nga Kuvendi, ngriti shqetësimin se në dokumentet zyrtare të shpërndara nga shërbimet e parlamentit, Belinda Balluku figuron ende si ministre, pavarësisht diskutimeve për heqjen e imunitetit të saj.

Balliu shpjegoi se kishte kërkuar listën e diskutantëve, por bashkë me të i ishte dhënë edhe lista e anëtarëve të kabinetit qeveritar, e për habi, në këtë listë zyrtare, emri i Belinda Ballukut renditej si ministre.

"Këtu na rezulton që i dyti ministër është Belinda Balluku. A vazhdon të jetë ministre kjo zonjë apo jo?," deklaroi ai, duke mbajtur në dorë dokumentin.

Deputeti shtroi një sërë pyetjesh drejtuar drejtueses së seancës Klodiana Spahiu dhe qeverisë. Ai kërkoi të dijë se cilat procedura po ndiqen që e lejojnë atë të figurojë ende në detyrë dhe nëse ushtron ende fuqi ekzekutive.

DEBATI:

Balliu: Tani, meqënëse ishte dhe diskutimi për imunitetet, unë kërkova nga shërbimet të na jepshin listën e diskutantëve. Dhe bashkë me listën e diskutantëve, na vjen dhe lista e ministrave. Se miqësi s'ia kemi hequr imunitetin zonjës Balluku, po këtu na rezulton që ministra janë Toni Gogu është i pari, i dyti është Belinda Balluku. Tani kjo zonja, a vazhdon të jetë ministre apo jo, se nuk e dimë. Se këtu tek ato çka na keni dhënë ju, zonja Balluku vazhdon të jetë ministre. Se kuptoj si është marrë vendimi, a vazhdon e merr rrogën si ministre apo...

Spahiu: E kuptova vërejtjen zoti Balliu, faleminderit. Do ta korrigjojmë. Zonja Zhupa keni fjalën.

(Zëra dhe debate të mbivendosura në sallë)

Balliu: Po flas për procedurën zonjë që keni bërë ju.

Spahiu: Po mirë mbarojeni, mendova që kishit... mendova që kishit e dhënë këtë vërejtje.

Balliu: Po pra kur të mbarojë koha e nderuar, juve mund ta ndërpreni fjalën, kur të mbarojë koha. Tani, unë jam, dua të di, cilat janë procedurat që ndiqen që kjo ka mbetur akoma ministre? Në i kalon në rroga akoma zonjës ministre? Në ka akoma fuqi ekzekutive zonja ministre? Dhe me çfarë ligji ka qëndruar, nëse ka qëndruar, ministre zonja Balluku, të cilës jo vetëm nuk i hiqet imuniteti, po nëpër shkresa vazhdon urdhrat t'i japi Belinda Balluku. Sipas dokumentave që na dhatë ju, jo që ju kemi dhënë ne. Ja dhe kamera ta shikojë, ja ku është Belinda këtu.