Meta: Shpopullimi është i qëllimshëm dhe pjesë e axhendës antikombëtare të Qeverisë

Partia e Lirisë ka thirrur sot mbledhjen e Komitetit Drejtues Kombëtar.

Në fjalën që mbajti, kryetari i Partisë së Lirisë, Ilir Meta shënjestroi qeverinë se në vend që të reagojë për katastrofën demografike të vendit, vazhdon t’i shërbejë një klike oligarkësh, me të cilët sipas tij ka në bashkëpronësi gjithçka.

Sipas Metës, shpopullimi është i qëllimshëm dhe pjesë e axhendës antikombëtare të Qeverisë.

META: Qeveria, në vend që të reagojë për katastrofën demografike të vendit, vazhdon me vullnet të plotë t’i shërbejë një klike oligarkësh, me të cilët tashmë ka në bashkëpronësi gjithçka, pasuritë dhe pronat, paratë dhe shërbimet publike.

Shpopullimi është i qëllimshëm dhe pjesë e axhendës antikombëtare të Qeverisë.

Shpopullimi vijon të mbetet një nga plagët më të mëdha që Edi Rama dhe “Rilindja” i ka shkaktuar vendit dhe një nga arsyet pse ende po mbahen të fshehta rezultatet e Censusit.

Rritja e niveleve të migracionit të të rinjve, e kombinuar me plakjen e popullsisë, pritet të thellojë krizën demografike dhe po dikton rritjen e mëtejshme të moshës së daljes në pension.

Në një vit Shqipëria humbet 36 mijë të rinj që largohen nga vendi dhe ndërkohë 23 mijë pensionistë shtohen në skemën e pensioneve.

Në vitin 2023 numri i tyre vlerësohet të ketë arritur në rreth 700 mijë persona, me një rritje rreth 19% në krahasim me 2014.

Pensionistët shqiptarë në pjesën dërrmuese marrin pensione shumë më të ulëta se kufiri i varfërisë i përcaktuar nga Banka Boterore në 6.85 USD në ditë.

Për një pensionist në qytet pensioni i pleqërisë është 6.4 USD në ditë, ndërsa pensioni i pleqërisë në zonat rurale është 3.8 USD në ditë ose sa gjysma e nivelit të varfërisë.

Efekti i rritjes në nivel dyshifror i çmimeve dhe veçanërisht atyre ushqimore ka rënduar edhe më shumë pensionistët dhe pesha e ushqimeve është 59% e shpenzimeve të tyre mujore.

Nëse në vitin 2018, pensioni mesatar ishte sa 31% e pagës mesatare bruto, në vitin 2023, ky raport arriti në 25%.

Ulja e kostos së lartë të jetesës është një nga objektivat kryesorë të politikave ekonomike dhe sociale të Partisë të Lirisë