Nga përfundimi i pagesave te dënimi i simboleve të komunizmit, Basha prezanton programin për ish të përndjekurit politikë

Kreu i Partisë Demokratike, Lulzim Basha ka prezantuar sot, më 20 Shkurt, 30 vjetori i rrëzimit të bustit të diktatorit Enver Hoxha, programin për ish-të përndjekurit të regjimit komunist.

Gjatë takimit me një grup ish-të përndjekurish, Basha deklaroi se: “sot është dita e një çasti vendimtar në historinë tonë si komb, është dita e mposhtjes së frikës ndaj komunizmit në emër të demokracisë. Në emër të progresit. Në emër të së ardhmes. Por beteja për demokraci sot vazhdon dhe është më e fortë se kurrë. Misioni i para 30 viteve, mbetet misioni ynë edhe sot.”

“Apeli i parë i imi sot është se na duhet të luftojmë me të njëjtin pasion për demokracinë në Shqipëri, të luftojmë me të njëjtin përkushtim dhe angazhim për të cituar presidentin Biden në fjalën e tij të djeshme, në Samitin Virtual të Sigurisë në Mynih, sepse demokracia  është diçka për të cilën duhet luftuar çdo ditë. Misioni i Partisë Demokratike, misioni ynë  është të garantojmë  demokracinë në Shqipëri  dhe të ecim përpara në këtë proces. As edhe një hap pas, por po kështu mos të tolerojmë hapa pas. Fatkeqësisht realiteti i 8 viteve  është realiteti I kthimit pas në të gjitha proceset  demokratike  për shkak dhe prej Edi Ramës.” shtoii më tej kryedemokrati.

Disa nga pikat kryesore të programit të Partisë Demokratike për ish të përndjekurit politik janë:

·         Brenda mandatit të parë do të përfundojnë pagesat për familjet e persekutuara nga regjimi komunist.

·         Angazhimi që në ditët e para në qeveri, për krijimin e instrumentit dhe fondin për gjetjen e trupave të njerëzve të pushkatuar. Qeveria e ardhshme do të ofrojë bursa studimi dhe kredi të buta për banesa, çifteve të reja nga pasardhësit e të përndjekurve politikë.

·         Subvencionimi i shërbimeve shëndetësore dhe rritja e pensioneve e të përndjekurve nga komunizmi, që të burgosurve politikë t’ju jepen 100 Euro shtesë mbi pensionet e tyre.

·         Atyre që kanë vuajtur punën skllavëruese dhe torturat e kolonive ndëshkimore në minierat e Spaçit e në Qafë të Barit do ti mundësohet një pension si të minatorëve për ato vite që kanë punuar aty

·         Do të dënohen të gjitha simbolet e komunizmit në Shqipëri dhe do të futet në sistemin arsimor edukim i veçantë për këtë periudhë të errët të historisë tonë. Rrëfimet dhe ditarët e burgjeve dhe të burgosurve politikë do të kenë një fond të veçantë por mbi të gjitha një vëmendje të veçantë për edukimin e të rinjve.

·         Angazhimi për ngritjen e muzeut në kujtim të viktimave të komunizmit. Angazhimi në ngritjen e monumenteve kujtimore në respekt të personaliteteve të vendit të veçanta, ngjarjeve të veçanta historike edhe sakrificave të përndjekurve politikë dhe të rezistencës së tyre gjatë periudhës së errët të diktaturës.

·         Angazhimi për miratimin e një ligji për pastrimin e figurës që nuk do të jetë vetëm një distancim njëherë e mirë nga diktatura gjakatare 50-vjecare

·         Garantimi që ky kapitull i errët i historisë tonë të mos rikthehet më në asnjë formë dhe në asnjë mënyrë dhe këtë kujtesë historike, këto viktima, këto heronj të kësaj kohe t’i kemi gjithmonë në zemër si shembuj dhe frymëzim të kurajës së një kombi që ecën i sigurt drejt destinacionit të vet perëndimor, europian dhe euro-atlantik.