Nga ulja e TVSH te rritja e pagës/ PD me projekt-rezolutë për krizën

Partia Demokratike ka paraqitur në Kuvend rezolutën për përballimin e krizës në vend.

Kryetari i komanduar i PD, Enkelejd Alibeaj, kërkoi uljen e taksës së TVSH-së me 6% për produktet bazë të shportës, rritjen e pagës minimale në 36 mijë lekë, si edhe dyfishimin e ndihmës ekonomike.

Alibeaj u shpreh se masat e shpallura nga qeveria janë të pamjaftueshme.

“Dua të falënderoj kolegët e mi që nuk bënë kurrë politikë. Masat e shpallura nga qeveria janë krejtësisht të pamjaftueshme. Janë pjesë e programit të qeverisës dhe jo të diktuara nga situata ku ndodhemi.Kjo është përmbajtja e rezolutës që ne propozojmë jo si instrument politik. Ky moment ka ardhur sot që të mendohet me shpirt dhe zemër për familjet shqiptare. Për këtë arsye nuk do lëshoja asnjë lloj provokimi politik. Sot duhet të mendojmë për barkun bosh të qytetarëve. Më kujtohen 6 rreshtat e parë të poemës së mjerimit të Migjenit. Kafshatë që nuk kapërdihet është o vëlla mjerimi”, tha Alibeaj.

10 pikat e projekt-rezolutës

1. Uljen në 6% të TVSH për mallrat e shportës bazë, propozim konsistent i Grupit Parlamentar të Partisë Demokratike;

2. Pezullimin e menjëhershëm të taksës së qarkullimit dhe kthimin e saj në nivelet e 8 viteve më parë, në masën 7 lekë për litër nga 27 lekë/litër aktualisht, duke eleminuar taksën Rama mbi karburantin;

3. Shkurtimin e menjëhershëm të shpenzimeve operative të qeverisjes qëndrore me të paktën 25% të buxhetit të planifikuar për këtë zë për vitin buxhetor 2022;

4. Dyfishimin e menjëhershëm të ndihmës ekonomike për të gjitha familjet në nevojë dhe jo thjesht trajtimin financiar të tyre për një periudhë afatshkurtër 3-mujore;

5. Rritjen e menjëhershme të pensioneve me dyfishin e indeksimit të parashikuar nga vetë qeveria, duke filluar nga 1 Prill 2022;

6. Rritjen e pagës minimale në masën 36,000 (tridhjetë e gjashtë mijë) lekë në muaj duke filluar nga 1 Prill 2022;

7. Pezullimin e menjëhershëm të pagesave buxhetore për PPP-të dhe koncesionet, vecanërisht ato të cilat janë nën hetim nga Prokuroria e Posacme Kundër Korrupsionit dhe Krimit të Organizuar (SPAK) për veprimtari korruptive;

8. Rritjen e subvencionimit ndaj fermerëve në masën 100 milion euro/vit me qëllim rritjen e prodhimit dhe uljen e kostove të tyre, për t’i bërë produktet shqiptare konkurruese në rajon;

9. Kryerjen e një hetimi të thelluar dhe gjithëpërfshirës nga Autoriteti i Konkurrencës, si dhe marrjen e masave urgjente në përputhje me ligjin nr. 9121, datë 28.7.2003 “Për Mbrojtjen e Konkurrencës”;

10. Raportimin nga Autoriteti i Konkurrencës përpara Kuvendit të Shqipërisë brenda një afati 30-ditor nga data e miratimit të kësaj rezolute, lidhur me konkluzionet e hetimit, masat e marra dhe zbatimin e tyre në praktikë.