Nisma ligjore për abuzimet seksuale, deputetja e LSI letër Nikollës: Të përfshihet sa me parë në punimet e Kuvendit

Deputetja e LSI-së Erisa Xhixho i ka dërguar kryetares së Kuvendi, Lindita Nikolla një letër, përmes së cilës i kërkon të përshpejtojë procedurat e përfshirjes në kalendarin e punimeve të parlamentit nisma ligjore për abuzimet seksuale.

Nisma ligjore u depozitua nga Xhixho pak ditë më parë në Kuvend, ndërsa thekson në letër, se e ka ndërmarrë këtë nismë për të bërë të mundur që edhe në Shqipëri të aplikohet një standard ligjor i njejtë si në shumë vende të BE-së edhe për kategorinë e njerëzve të dënuar për krime seksuale.

Letra e plotë:

E nderuar zonja Kryetare e Kuvendit,

Më lejoni t’ju bëj me dije se më datë 5 nëntor 2021, kam depozituar sipas rregullores së Kuvendit, nismen time ligjore me objekt shqyrtimin dhe miratimin e projektligjit “Regjistri Kombëtar i të dënuarve për krime seksuale”.

Meqenëse që prej shumë vitesh janë bërë përpjekje për të rregulluar me ligj mungesën në legjislacionin shqiptar të detyrimit për të krijuar regjistrin kombëtar të të dënuarve për krime seksuale, por që gjithnjë kanë mbetur përpjekje në tentativë, e ndërmora këtë nismë për të bërë të mundur që edhe në Shqipëri të aplikohet një standard ligjor i njejtë si në shumë vende të BE-së edhe për këtë kategori njerëzish të dënuar për krime seksuale.

Ndërkaq, kam mësuar se një tjetër nismë ligjore me të njejtin objekt është depozituar ne Kuvend nga organizata të shoqërise civile, ç’ka në thelb shpreh ndjeshmërinë e lartë të shoqërisë për këtë çështje.

Kësisoj zonja Kryetare, mendoj se eshtë në nderin tonë si Kuvend që keto dy nisma t’i trajtojmë me prioritet dhe vëmendje të veçantë, për të mundësuar miratimin e një ligji sa më funksional dhe efektiv.

Duke e njohur dhe çmuar ndjeshmërinë tuaj ndaj problematikës shqetësuese të akteve kriminale të dhunës seksuale, e në veçanti të dhunës seksuale ndaj të miturve, me angazhimin e plotë për të kontribuar maksimalisht si nismëtare e projektligjit që të krijojmë një klimë pune gjithëpërfshirëse dhe transparente, me seriozitetin që meriton trajtimi i çështjeve me ndjeshmëri të lartë në opinionin qytetar, dhe duke marrë në konsideratë edhe faktin se gjendemi në muajin e Fiongos Blu që simbolizon ditët ndërkombëtare kunder dhunës ndaj femijeve dhe të drejtat e tyre,

e gjej me vend t’ju kërkoj që të dy propozimet e administruara tashmë nga administrata e Kuvendit,  të përfshihen sa me parë në kalendarin e punimeve të Kuvendit.

E bindur në ndjeshmërinë dhe mirëkuptimin tuaj” mbyllet postimi i deputetes së LSI-së.