Pikat kryesore nga bashkëbisedimi i Berishës me shqiptarët e Diasporës

Kreu i Partisë Demokratike Sali Berisha ka zhvilluar sot një bashkëbisedim me emigrantët dhe Diasporën në Zelandën e Re. Në fokus të diskutimit kanë qenë temat aktuale në Shqipëri duke filluar nga largimi masiv i shqiptarëve, vota e Diasporës, nisma “Ballkani i Hapur” e deri te legalizimi i kanabisit.

■ Vota e Diasporës

"Në rrafshin politik, emigracioni dhe diaspora janë të përjashtuarit e mëdhenj nga Shqipëria. Shqipëria nuk mbyll kufijtë si dikur ndaj emigracionit e diasporës, por ajo nuk ka lejuar votën tuaj, nuk ka vendosur atë bashkëpunim të domosdoshëm për zhvillimin e saj dhe përparimin e shqiptarëve. Në 2013 bëmë gati ligjin ku pranonim votimin online të emigrantëve të Diasporës, aty ku ishin. Rama kërcënoi në mënyrë ultimative se do bojkotonte zgjedhjet nëse ky ligj kalonte. Në këto rrethana u detyrova të pranoj ultimatumin e tij. Sot ju garantoj se nuk do ketë zgjedhje në Shqipëri pa votën tuaj", tha Berisha.

■ PS rikthen monizmin dhe rrëmben votën e lirë

“Dua të sjell disa nga zhvillimet dramatike të cilat e bëjnë kritike situatën në Shqipëri. E para, pas zgjedhjes së presidentit, PS ka rikthyer në Shqipëri monizmin e plotë. Para zgjedhjes së presidentit, ky grafik tregon se nga viti 2013 në të cilën një mazhorancë kishte gjithsej 48% të pushtetit në Shqipëri, në vitin 2020 mazhoranca arrin të ketë 91% të pushtetit në Shqipëri. Të ketë më shumë seç kishte PPSH në vitin 1991. Dhe pas zgjedhjes së presidentit të republikës, kjo përqindje shkon në 99.9%. Ju besoj jeni informuar se PS përjashtoi këtë vit përfundimisht votën e lirë brenda saj. Kryetarët e PS, sipas vendimit të djeshëm të Kryesisë së kësaj partie, nuk votohen më nga anëtarësia, kryetarët e degëve, por emërohen nga Edi Rama, njëlloj si dikur nga Byroja Politike dhe Enver Hoxha”, deklaroi Berisha.

■ “Ballkani i Hapur”

“U themelua në Novisad para tre vitesh si mini-shengen nga Serbia, Shqipëria e Maqedonia, aleancë trelaterale. Harta që u paraqit atë ditë, nga kjo trojkë, Vuçiç-Rama-Zaev, paraqiste Kosovën haptaz pjesë të territorit të Serbisë. Këtë hartë e publikoi në Facebook-un e tij edhe Rama. Më vonë tha se ma publikuan gabimisht asistentët. Ky projekt sipas Vuçiç disa ditë pas samitit të Novisadit, u quajt Jugosllavia e vjetër plus Shqipërinë, rikthim te doktrina apo ideja se Ballkanin e stabilizon hegjemonizmi serb. Hegjemonizëm që u vendos në dekadën e dytë të shekullit të shkuar dhe përfundoi me luftërat më të përgjakshme të përsëritura në rajon. Për më tepër ky projekt me influencë ruse”, tha Berisha.

■ Legalizimi i kanabisit

“Droga është krim, krim dhe vetëm krim. Cilido vend që legalizon drogën, nuk bën gjë tjetër veçse legalizon në një mënyrë apo tjetrën krimin që sjell ajo. Në Shqipëri kanabisi që u mboll në vitin 2015 masivisht, krijoi miliarda euro dhe bëri që trafikantët shqiptarë të pushtojnë me ato para tregun e kokainës në vende te Amerikës Latine, dhe Shqipëria të bëhet jo vetëm prodhues kryesor i kanabisit në kontinent por dhe një hap ndër më kryesorët, i kokainës dhe drogave të tjera”, tha Berisha.

■ Valentin Lumaj, Kryetar i Vatrës në Michigan

“Ne si Diasporë, të majtë dhe të djathtë, të gjithë, ka një pakënaqësi për këtë realitet shqiptar. Vazhdoni protestat si mjeti i fundit demokratik që iu ka mbetur shqiptarëve për të realizuar të ardhmen e tyre në Shqipëri. Është keqardhje e madhe. Më shumë se gjysma e popullsisë së Shqipërisë jeton në emigracion. Mbi 500 mijë shqiptarë u larguan në 8 vitet e fundit, kjo është fatkeqësi. Ju bëj thirrjeve, të rinjve, studentëve, forcave punëtore të mbështesin këtë nismë të shoqërisë civile dhe PD për protesta të vazhdueshme, deri në rrëzimin e kësaj klike të korrupsionit dhe drogës.”

■ Besa Sharra, aktiviste e njohur në diasporë në SHBA

“Absolutisht mendoj se shpresa e Shqipërisë ka humbur. Për këtë arsye kemi formuar një organizatë, Diaspora për Shqipërinë e Lirë, organizatë që faktorizon në mënyrë shumë të mirë disaporën me anë të votës që është e garantuar me Kushtetutë.”

■ Big Basta, artist

“Jam mik dhe dhëndër në Kosovë, ndjek me keqardhje ecurinë e nismës ‘Ballkani i Hapur’, i cili paturpësisht tregon se në 2022, mes vëllezërve dhe një kombi, faktori serb përdor sërish politikën përçarëse.

Jeni parë shpesh zoti Berisha si babai i bashkimit të kombit,  dhe e ndjeni se fryma vëllazërore po duket si më e zbehur. Çfarë politike do ndiqni që Shqipëria të rifitojë sërish atë reputacion në Kosovë, për të rikthyer besimin tek vëllezërit tanë?”

■ Studenti ekselent në Britaninë e Madhe, Daniel Nikolla

“Të rinjtë duhet të afrohen, dhe jo të largohen nga vendi. I bashkohem ftesës së opozitës për gjithë shqiptarët e Shqipërisë në vend dhe diasporë, për pjesëmarrjen masive në protestën kombëtare në 7 korrik në orën 19:00”.

■ Gazetarja Alba Kepi nga Roma

“Tre janë çështjet që dua të sjell në vëmëndjen e Partisë Demokratike. Çështja e medias, informacionit, s’ka një shoqëri demokratike pa një media të lirë dhe të pavaruar, pa një media të pashantazhuar. Vitet e fundit kam përcjellë skandale të shumta nga Italia, dosje të antimafias që kanë pasur emrat e pushtetarëve, ministrave apo politikanëve shqiptarë, të përfshirë në afera apo trafiqe të paligjshme. Partia Demokratike duhet të ketë në vëmendje figurën e gazetarit, të krijojë një qasje strukturore për të mbrojtur këtë figurë, për të pasur një media sa më transparente. E dyta, dua të di qasjen e PD për shpëtimin e identitetit kulturor e historik, për çmontimin e këtij qyteti që është mbushur me kulla të frikshme, vend lavatriçe i parave të pisëta. E treta, ndodhem në makinë, kam raportuar për mediat shqiptare aktivitetin e emigrantëve në Romë. Shprehin solidaritetin ndaj asaj çka do jetë protesta madhështore e 7 korrikut. Shumica e tyre kanë prerë biletën për të qenë krah jush në Tiranë.”

■ Erisa Bajaziti, aktiviste në Belgjikë

"Mbështes shpirtin e protestës, frymën opozitare dhe ndjesinë e shpresës që japin këto takime. Ky duhet të jetë një moment kthese për Shqipërinë dhe sot duhet më shumë se kurrë guxim. Kam mbi 20 vjet që jetoj larg Shqipërisë dhe që prej ditës së parë kam jetuar me ëndrrën për t’u kthyer në vendin tim. Por, Shqipërinë e kam parë përherë e më shumë në pozicione të brishta. Sot i duhet bërë rezistencë këtij pushteti dhe të krijohet një shtet demokratik. Është detyra jonë për të bërë këtë gjë. Nga shpopullimi i Shqipërisë po ndjehen pasojat. Një dramë sociale kjo që nuk e dimë se ku e ka fundin".