Programi i PD për turizmin, Kashahu: Do të dyfishojmë vendet e punës

Partia Demokratike prezantoi sot programin për zhvillimin e turizmit. Sekretari për Marrëdhëniet me Jashtë Arben Kashahu tha se ky plan synon të sjellë ndryshimin , për të cilin ka nevojë vendi. Ai tha se qeveria socialiste ka dështuar në menaxhimin e këtij sektori “jetik” për vendin.

Sipas Kashahut, programi i PD do të dyfishojë vendet e punës në industri dhe do të diversifikojë ofertën turistike ku të gjithë aktorët e komunitetit të marrin pjesë.

“Pas 8 vitesh dështimi të përgjithshëm e në cdo sektor, spikat dështimi në sektorin kryesor dhe jetik të Shqipërisë: Turizmi! Dhe jo për shkak të ndonjë fatkeqesie natyrore, por të qeverisë! Pas 8 vitesh që shqiptarët dëgjojnë vetëm fjalë por nuk shohin asnjë vepër të realizuar, dëgjojnë probleme por jo zgjidhje, është koha që kjo të ndryshojë, është koha për ndryshim rrënjësor”, tha ai.

Kashahu bëri një përshkim të detajuar të gjendjes në të cilën ndodhet turizmi.

-Niveli i punësimit në industri në fund të vitit 2019 është 4.15% e totalit. Ai është më i ulti në rajon, është më pak se gjysma e Malit të Zi.

-Të ardhurat mesatare për turistë prej 397$ janë më të ulta në rajon.

-Kohëzgjatja e sezonit turistik është sa gjysma e të gjitha vendeve fqinje duke shpërdoruar të gjitha burimet njerëzore, natyrore e kulturore në vend.

-Indeksi i konkurencës së industrisë së turizmit e rendit Shqipërinë në vendin e 86-të në vitin 2019.

-Për konkurencën e çmimeve, kryesisht lidhur me koston e të udhëtuarit për dhe në Shqipëri, Shqipëria renditet në vendin e 89-të, shumë më keq se Mali i Zi dhe Maqedonia e Veriut.

-Përsa i përket aksesit ndaj burimeve kulturore dhe natyrore, Shqipëria renditet në vendin e 94 në vitin 2019 duke dëshmuar keqmenaxhimin në promovimin e burimeve kulturore.

-Lidhur me cilësinë e infrastukturës, Shqipëria renditet e në vendin e 88. Veçanërisht për infrastrukturën e transportit ajror, Shqipëria renditet në vendin e 105, shumë më poshtë se fqinjët me vetëm 40 fluturime direkte nga 19 vende.

- Kapacitetet akomoduese janë më të ulta në rajon, tre herë më të vogla se ato të Malit të Zi.

-Në lidhje me lehtësinë e të bërit biznes, Shqipëria rënditet në vendin e 82-të, shumë më poshtë se vendet fqinje.