Xhaferri bashkëatdhetarëve në Londër: I japim fund dekadës gomoneve, ta bëjmë Shqipërinë vendin ku dëshironi të ktheheni me familjet tuaja!

Shqiptarët që jetojnë në Britaninë e Madhe i janë përgjigjur masivisht ftesës së bërë nga kryetari i PD-së, Sali Berisha për një takim në Londër.

Kreu i FRPD, Besart Xhaferri tha se vitet e fundit është rritur shumë numri i të rinjve që kanë braktisur vendin tonë dhe kanë ardhur të gjejnë strehë në Angli, pasi inkriminimi dhe korrupsioni janë e vetmja alternative që ai u ka lanë.

Fjala e kreut të FRPD, Besart Xhaferri në takimin në Londër:

Sot jam i lumtur që jam mes jush, që pa më të voglin dyshim jeni krenaria e mërgatës sonë, por jam i trishtuar pasi me ju do doja që në kuadër të projektit tonë për transformimin e Shqipërisë të takohesha në Kukës, në Has, Tropojë, Dibër, Mat Mirditë, Shkodër Tiranë dhe në ato qytete shqiptare, që aq shumë u mungon vitaliteti dhe vizioni juaj. 

Unë sot pavarësisht se kam shumë të për të thënë nuk do flas shumë pasi epiqendra e këtij takimi nuk jemi as unë as Floriana, as Lela, por jeni ju që keni lënë punët tuaja dhe keni ardhur në këtë bashkëbisedim që është ndër më të bukurit të organizuar në diasporë dhe një ogur i mbarë e një marrëdhënie të re që ne do ndërtojmë me atë është ajka e kombit shqiptar, diaspora jonë e jashtëzakonshme.

Dua një duartrokitje të fortë për ju dhe për ata që na ndjekin përmes medieve dhe platformave në rrjetet sociale.

Kur në 2017 me Arben Ristanin themeluam degën e PD në Londër, dëshira ishte që nga këtu të spikasnim të rinj të talentuar që ti ftonim të angazhoheshin në Shqipëri në politike, por korrupsioni i një Narkoqeverie, bëri që shumica prej nesh të jenë këtu e jo në Shqipëri, por koha është të punojmë për të ndryshuar këtë realitet, pasi sot më shumë se kurrë Shqipëria ka nevojë për kontributin e secilit prej jush, për të mundësuar rrotacionin, aq shumë i nevojshëm për një komb që është në intubim.

Ju jeni frika më e madhe Edi Ramës, e jo rastësisht ai ka angazhuar për diasporën një nga eksponentët më të inkriminuar të qeverisë së tij, pasi për të diaspora ka qënë dhe mbetet një lumë parash, që i mban gjallë ekonominë dhe i mundëson vjedhjen pa i kërkuar kush llogari.

Jam i neveritur nga ftesa që ju bëri Damian Gjiknuri, ku erdhi këtu për të vetmin hall të Edi Ramës, aministinë fiskale, pa e ditur se cili është realiteti juaj, pa e ditur se cilat kanë qenë sfidat që keni kaluar për të mbërritur këtu ku jeni, si një komunitetet më dinamik, më solid më të integruar dhe më të shkolluar ndër të huajt në Britaninë e madhe.

Historia juaj nuk është veç histori suksesi pasi në themel ka dhimbje që bashkë me ju ka  përshkruar kanalin e La Manshit, duke lenë zemërthyer prindërit e fëmijët në Angli.

Ka nga ata që në gomone kanë hipur me fëmijët e vegjël, pasi e kuptuan se Edi Rama atë vend kishte synim ta kthente në një azil të madh dhe eksodi juaj masiv ka qenë një politikë e mirëfilltë antikombëtare, ashtu si kanabizimi që përgjaku vendin, apo projekti i pastrimit të parave në ndërtim, që po zhvat shqiptarët atje dhe ju që nga këtu investoni atje.

Unë për shkak të viteve të mia këtu dhe lidhjeve njoh dhe histori tragjike, të rinj të djegur në kamionë dhe të mbytur në gomone, e të vetëvrarë në burgje, histori dhimbje, që pak njerëz flasin. 

Ju normalisht realitetin në Shqipëri e shikoni tek mediet kryesore dhe tradicionale të cilat për fat të keq janë kthyer në leva të qeverisë, pasi shumë prej tyre financohen nga paratë publike të koncensioneve korruptive, siç është inceneratorit.

Ju mund të lexoni edhe media që flasin për turizmin, por të jeni të sigurt  se janë lajme të paguara me ato para që ua  zhvasin prindërve dhe të afërmve të tuaj në Shqipëri ose janë të paguara me para të narkotrafikut, por nuk kanë lidhje me realitetin ne Shqipëri.

Ata 10 milionë turistët e huaj jeni ju që këni mundësi të bëni pushime në çdo vend të globit, po vini ti bëni në Shqipëri për ti dhënë hov turizmit dhe sipërmarrjes, madje merreni me vete dhe miqtë tuaj.

Turistë të huaj Rama i thotë vëllezërve tanë të gjakut në Dardani, me pak fjalë gjyshja e fëmijëve të mi pejanë për këtë qeveri është turiste e huaj, ashtu si një shqiptar nga Ilirida, apo nga trojet tona në Mal të zi.

Ky është dallimi ynë me Rilindjes se për ta Shqipëria fillon në Gjirokastër e mbaron në Kukës, kurse për ne fillon në Çamëri e mbaron në mollë të kuqe. 

Përtej propagandës së medieve të Tiranës, mediet ndërkombëtare si RAI, BILD The Times e të tjera media kanë nisur ta pikturojnë Edi Ramën ashtu siç është, kreun e një Narkoshteti, që i ulet në gjunjë çdo lideri që mendon se ka pushtet por nga ana tjetër kërkon të gjunjëzojë popullin e tij, por nuk do ja dalë, se ju nuk do na lini vetëm.

Unë jam pjesë e një brezi studentësh shqiptar që kemi përfunduar studimet e larta në Angli, por me vetëdije të plotë kam refuzuar të vijoj jetën time në këtë vend të bekuar për secilin e prej nesh këtu, vetëm për faktin se me i bekuar se Britania, për mua ishte atdheu im, ai atdhe ku kisha prindërit, ku njoha partneren time dhe ku kam vendosur më çdo çmim të rris Andrrën dhe Iartin, dy fëmijët e mi.

Unë kam një sipërmarrje që ka në fokus sjelljen e studentëve shqiptar për të studiuar në Angli dhe në bisedat e mia me ta, duke ju dhënë shembullin time, u them ikni në Angli njihni kryeqendrën e botës, Lodrës, krijoni kontakte pune, por në fund kthehuni në atdhe se ai vend ka nevojë për secilin e prej nesh, e për hir të së vërtetës sot ka më shumë në nevojë se kurrë se struktura e kombit shqiptar është në prag të shpërbërjes.

Unë sipërmarrjen e kam nisur në këtë vend, por më pas 4 sipërmarrjet e mia që shtrihen në disa vende të botës, qendrën e kanë në Tiranë, Prishtinë, dhe ju ftoj ta bëni diçka të tillë pasi në politikat e Partisë Demokratike është parashikuar mbështetje për këdo të ri nga diaspora që vjen në Shqipëri, do ketë një amnisti taksash për një periudhë 5 vjeçare.

Edi Rama me politikën e tij të kanabizimit e ka ekspozuar ekonominë, politikën dhe rininë përballë fuqisë së pamatë të krimit të organizuar, ndaj vitet e fundit është rritur shumë numri i të rinjve që kanë braktisur vendin tonë dhe kanë ardhur të gjejnë strehë në Angli, pasi inkriminimi dhe korrupsioni janë e vetmja alternative që ai u ka lanë.

Ndaj sot në Angli shqiptarët nxjerrin artistë si Rita Ora dhe Dua Lipa e sportistë si Broja, e në Shqipëri nxjerrin artistë si Petrit Vullkani me shokë, pasi tallavaja dhe mjerimi janë e vetmja gjë që ajo qeveri u ofron. 

Ne sot jemi këtu se kemi vendosur që fëmijët tanë, fëmijët e shqiptarëve dhe të rinjtë e vendit tonë të mos jenë të ekspozuar vetëm përballë krimit, por të jetojnë në një vend, ku në shkolla të kenë laboratorë fizike e kimie dhe jo laboratorë droge si tani.

Në duam të ndërtojmë një vend, ku në spital  jeta të mos jetë në mëshirë të Tireve të Rilindjes dhe Manualit të Bandës 5D, që guxon dhe vjedh ditët e atyre të prekur me kancer.

Ne kemi ardhur me ju pa autobus, pa shpurë gazetaresh oborri me vete, por vetëm me fjalën tonë e besën e tonë, se nuk do ta tradhtojmë besimin tuaj në rrugën e përbashkët për të ndryshuar Shqipërinë.

Në nuk do ta leme Shqipërinë peng të Edi Ramës, që vetë është peng i bandave dhe zullumeve të tij që kanë minuar dhe raportet me aleatët tanë historik.

Ftesa ime është që të dilni pasivisht të votoni dhe të flisni me familjarët tuaj në Shqipëri dhe ti bindni se rrotacioni është varka e fundit e integrimit të vendit, pasi vetëm duke u integruar do nisë kurimi i plagës së eksodit dhe Shqipëria do përjetojë një valë të dytë rikthimi të djemve e bijave të saj siç e përjetoi në qeverisjen e dytë të Partisë Demokratike, forcës politike që në 15 vite qeverisje, i solli vendit, liberalizimin e vizave, anëtarësimin në NATO, konsolidimin e sistemin energjetik, rrugën e Kombit dhe pavarësinë e Kosovës që në politikën e jashtme të forcës sonë politike ka qenë gjithmonë yll polar.