Diskutimet në Kuvend për rezolutën e ‘Srebrenicës’/ Kritikat e demokratëve, çfarë kërkoi PS

Seanca plenare e kësaj të enjteje është përfshirë nga diskutimet për rezolutën që dënon gjenocidin serb në Srebrenicë, e cila pritet të miratohet.

Rezuluta u propozua më herët nga PD, por u rrëzua nga socialistët, të cilët më vonë depozituan rezolutën e tyre.

Seanca nisi me një minutë heshtje në nderim të viktimave të masakrës së Srebrenicës. Në rezolutë, në zbatim të një vendimi të mëparshëm të Parlamentit Evropian, shpallet 11 korriku si Ditën e Përkujtimit të gjenocidit në Srebrenicë.

Kryetari i PD-së, Sali Berisha deklaroi se rezoluta e dënimit të genocidit serb është e paplotë. Sipas tij, po veprohet me standarde te dyfishta, për sa kohë kryeministri sillet si një vasal i Aleksandër Vuçiçit dhe mbështet Ballkanin e Hapur. 

“Ju edhe ndaj genocidit rus në Ukrainë mbani një qëndrim të dyfishtë nga njëra anë e pranoni nga ana tjetër pranoni këtu përdhunuesit e grave dhe vrastësit e fëmijëve në Ukrainë.

Nga njëra anë ju nuk pranoni të dënoni Vuçiçin, nga ana tjetër flisni për Ukrainën kur pranoni në Shqipëri xhelatët rusë, me linjë ajrore të Serbisë që e bën 18 herë në javë rrugë. Keni një marrëveshje të fshehtë për të pranuar vrasësit. A mund të pranoni ju xhelatët që i kanë duart me gjak që vijnë nga Mariupoli dhe Bucha”, tha Berisha.

Edhe deputetja demokrate Jorida Tabaku u shpreh se rezoluta është e paplotë, ndërsa i bëri thirrje PS-së, që të reflektojnë dhe të përfshijnë amandamentet e Partisë Demokratike.

“Amandamentet lidheshin me dy elementë kryesorë dhe unë kam këtu një përmbledhje të amendamenteve. E para ishte që Partia Socialiste duhet patjetër të dënojë genocidin, të njohë viktimat, të njohë që aty ka ndodhur një genocid dhe të njohë shkeljen e të drejtave të njeriut. Unë gjykoj që rezoluta e sotme është e mangët dhe nuk e arrin qëllimin, megjithatë ne do ta votojmë atë.

I bëj thirrje grupit socialist të reflektojë deri në fund të seancës dhe të pranojë amendamentet e Partisë Demokratike, për ta dënuar genocidin ta njohur atë si genocid mbi parimet dhe standardet e Kombeve të Bashkuara dhe Këshillit të Evropës”, tha Tabaku.

Po ashtu, deputeti Tritan Shehi ka kritikuar rezolutën. Sipas tij, dokumenti nuk është në të njëjtën linjë me të organizmave europiane dhe se Kosovës nuk i jepet hapësira që i takon.

“Ju jeni jashtë linjave të Parlamentit Evropian. Ju kudo thoni gjenocidi i forcave serbe e ato boshnjake, ju mohoni unitetin serboboshanjk dhe serb në Srebenicë.

Nga ana politikë kjo rezolutë është jo në përputhje me realitetin, jeni së paku 5 hapa nga rezolutës së PE.

Kjo është përgjegjësia juaj, ju fusni këtu dy rreshta për Kosovën për të larë gojën? As atje nuk dënoni gjenocidin, ju dënoni spastrimin etnik dhe këtë ju s'keni guxim ta thoni, mendoj se kjo rezolutë ka nevojë për përmirësim”, tha Shehi.

Në një prononcim për mediat nga jashtë Kuvendit Tabaku tha se pa dënimin e genocidit serb në Srebrenicë dhe pa njohjen e masakrave që ushtria serbe ka kryer, rezoluta do të jetë e paplotë.

Kreu i LZHK-së, Dashamir Shehi shprehu nevojën për ndërgjegjësim. Sipas tij, miratimi i kësaj rezolute nuk është thjesht detyrim formal.

“Ky nuk është detyrim formal, ne jetojmë në Ballkan dhe do jetojmë dhe kemi jetuar 1500 bashkë me sllavët, duhet të gjejmë një rrugë, ekuilibër një shteg në mënyrë që të bëjmë një paqe. Shqipëria duhet të shkojë në mënyrë definitive drejt Evropës”, tha Shehi.