Gazeta austriake akuza Metës: Lobim 700 mijë $ me kompani ‘offshore’, reagon Presidenca: Gati padia për shpifje

Gazeta austriake ‘Kronen Zeitung’ ka shkruar një artikull ku hedh dyshime se presidenti Ilir Meta është përfshirë në një lobim prej 700 mijë dollarësh, me qëllim vizitën e tij në SHBA në inaugurimin e ish-presidentit Donald Trump përpara Kapitol.

‘Kronen’ shkruan se denoncimi është bërë nga një informator i cili u fsheh në Austri “për shkak të akuzave dhe frikës së ndonjë atentati. Provat mund të tronditin peizazhin politik të Shqipërisë dhe të rrëzojnë askënd tjetër veç presidentit.”

Në artikull thuhet se Ilir Meta që nga koha kur u bë President i Republikës së Shqipërisë “erdhën flukse parash që dëshmitari kryesor i përshkroi si thellësisht të korruptuara”.

“Më 20 janar 2017, Meta ndau një foto të tij dhe një kolegeje partiake në inaugurimin e Donald Trump përballë Kapitolit në Uashington. Për të fituar akses në inaugurimin dhe zyrtarët republikanë, ata thuhet se lobuan me zell përmes një kompanie guaskë qipriote. Kostoja: 700,000 dollarë. Deri më sot, është e paqartë se kush e ka paguar në të vërtetë për të. Vetë Meta pretendon se është ftuar nga republikanët. Sipas dokumenteve gjyqësore amerikane, 700,000 nga një avokat i afërt me Metën kanë kaluar përmes kompanisë offshore Dorelita Limited”, thuhet në artikull.

Denoncuesi në fjalë, që ‘Kronen’ përmend, ka deklaruar se është nënshkruar një kontratë mes palëve të LSI dhe avokates që parashikon pjesëmarrjen në inaugurim. Sipas gazetës austriake, pjesë e përfitimit nga lobimi dyshohet të jetë edhe kryetarja e LSI, Monika Kryemadhi, që Kronen supozon se bashkëshortja e Presidentit i ka kryer me paratë e lobimit

“50 mijë euro në muaj për takime me senatorë amerikanë, darkë, udhëtime dhe me sa duket edhe operacione estetike për zonjën e Metës, Monika Kryemadhi, e cila mori kryesinë e LSI-së nga bashkëshorti i saj”, shkruhet në artikullin e ‘Kronen’.

 Pas lajmit të publikuar nga media austriake, ka reaguar edhe zëdhënësi i Presidencës Tedi Blushi. Në një postim në Facebook, Blushi shkruan se deklaratat e bëra në artikull nuk janë asgjë veçse shpifje dhe të fabrikuara dhe të konsumuara prej vitesh.

Zëdhënësi i Presidentit ka njoftuar se do të bëhet gati një padi për “Shpifje” dhe “Cënim të imazhit publik”.

“Këto shpifje, mjerisht të fabrikuara dhe të hedhura në tregun mediatik edhe kohë më parë, e kanë marrë përgjigjen shumë të qartë dhe në mënyrë asgjesuese, që në prill të vitit 2018.

Edhe kjo përpjekje e radhës, e rifabrikuar në mënyrë qesharake dhe vulgare, do të marrë përgjigje përpara drejtësisë austriake.

Presidenti i Republikës, ka autorizuar stafin dhe mbrojtësit ligjorë, që të përgatisin menjëherë padinë “Për përhapjen e të dhënave të pavërteta”, “Shpifje”, “Cenim të imazhit publik”, që në këtë rast cenon rëndë edhe interesat e larta shtetërore.

Në këtë mënyrë, shpifësit do të marrin përgjigjen e merituar përballë drejtësisë”, shkruan Blushi.