Nga data për raundin 2 dhe ironia e Gjekmarkajt te qëndrimet ndryshe të demokratëve, ç'ndodhi në Konferencën e Kryetarëve

Konferenca e Kryetarëve caktoi 23 majin për raundin e dytë të votimit për Presidentin e ri. Kandidaturat do të diskutohen dhe kalojnë në Komisionin e Ligjeve në orën 10.00 dhe më pas do të votohen në Kuvend në orën 18.00.

Mbledhja u shoqërua sërish me debate dhe akuza mes palëve. Përfaqësuesit e mazhorancës u shprehën se opozita nuk mund t’i kushtëzojë në propozimin e një kandidati.

Ndërsa deputetët e kësaj të fundit vijojnë akuzat se PS po zhvillon një proces farsë. Kreu i PR-së, Fatmir Mediu tha prerë se opozita duhet të dalë me një kandidat të përbashkët, ose në të kundërt të largohet nga procesi.

Deputetja Jorida Tabku i konsideroi Konferencat e Kryetarëve “si terapi grupi” dhe aspak serioze.

“Ikin dhe vijnë njerëzit, largohen e më pas vijnë prapë. Çështja është sipas kalendarit. Unë s’kam qenë ndonjëherë më e keqardhur se dje. Kur lexoja ato lajme, që dështon raundi i parë, më erdhi shumë keq, qoftë për të ardhur një diskutim serioz. Më erdhi keq që jam deputete e parlamentit dhe iu ofruam një pamje të tillë shqiptarëve”, tha ajo.

Ndërsa Agron Gjekmarkaj ironizoi duke thënë se do të propozojnë Edi Ramën për president. Ai shtoi se Shqipëria ka nevojë për president më shumë sesa për një njeri nga PS apo PD.

“Ndoshta në optikën e njeriut që vendos për çdo gjë dhe për çdokënd, askush nuk është i denjë për postin e Presidentit të Republikës, atëherë ne mund të propozojmë që ta bëjë si punë part time paradite të jetë kryeministër dhe pasdite president Republike, t’i bashkojë dy poste në një. Kjo është një ironi e hidhur e një realiteti ku jetojmë. Besoj shumë që Shqipëria ka nevojë për një President më shumë se sa një njeri i opozitës apo i PS-së. Një president euro-atlantik”, tha ai.

Deputetja Grida Duma ritheksoi se kandidatin për President duhet ta propozojë opozita. Ajo doli kundër qëndrimit të Enkelejd Alibajt për përcaktimin e kritereve, duke e quajtur këtë proces fasadë.

“Keni pasur propozime që t’ia jepni kandidatin opozitës. Sot ne këtu të jemi fasada që të merrni disa kritere nga ne dhe të thoni pastaj që mbi kriteret e opozitës zgjodhëm presidentin. Unë shkoj me logjikën që të këtë të enjte ta bëni seancën.

Të vijmë me një emër nga opozita. Mbi atë emër nga opozita bëni dhe votimin edhe kundër po të doni. Besoj që jemi jashtë konceptit. Pra kandidati i qëndron opozitës. Votojeni. Në rast se nuk i votoni raundet tuaja merrini se i keni në xhep. Procesin me raunde e konsideroj të pavlefshëm dhe fasadë”, u shpreh ajo.

Socialistja Elisa Spiropali replikoi, duke thënë se janë të hapur për propozimet ndërsa ironizoi qëndrimet e kundërta brenda përfaqësuesve të opozitës.

“Më duket e habitshme që Alibeaj thotë diçka dhe zonja Duma tha diçka tjetër. Së pari duhet të bini dakord se çfarë doni prej nesh, prej vetes dhe çfarë prisni nga ky proces. Keni nisur vetëm letra. Edhe ato të paqarta. Edhe ato të kundërshtuara këtu nga një anëtar dhe një tjetër. Ju folët për një sfidë të pazareve të vjetra dhe skutave. Ju sërish paraqisni kushte”, deklaroi Spiropali.